Rhybudd am wyntoedd cryfion yn parhau yng Nghymru

Mae rhybudd melyn am wyntoedd cryfion yn parhau i fod mewn grym dros rannau o Gymru ddydd Mercher.

Mae disgwyl hyrddiadau hyd at 50mya mewn ardaloedd mewndirol a thros 60mya ar hyd yr arfordir.

Roedd y rhybudd cyntaf mewn grym rhwng 15:00 ddydd Mawrth a 03:00 fore Mercher ym mhob rhan o Gymru.

Ond mae'r Swyddfa Dywydd wedi rhybuddio y gallai'r amodau achosi trafferthion tan hanner nos, nos Fercher yn rhannau o orllewin a de Cymru.

Ddydd Mercher, fe gafodd rhannau o'r M4 eu cau - i'r ddau gyfeiriad ar Bont Llansawel ger Port Talbot a Phont Cynffig rhwng cyffordd 37, Porthcawl a chyffordd 38, Margam.

Mae'r croesiad fferi o Abergwaun i Rosslare yn Iwerddon wedi ei ganslo brynhawn Mercher oherwydd y tywydd.

Roedd yr amodau'n wyntog yn ardal ffordd yr M48, yr hen Bont Hafren, fore Mercher.

Bu'n rhaid i feiciau, beiciau modur a cheir oedd yn tynnu carafán ddod o hyd i ffordd arall yn lle defnyddio'r A55 nos Fawrth

Mae'r rhybudd, rhwng 06:00 a 23:59 ddydd Mercher, yn berthnasol i siroedd Abertawe, Bro Morgannwg, Caerfyrddin, Castell-nedd Port Talbot, Penfro a Phen-y-bont ar Ogwr.

Fe allai'r gwyntoedd achosi trafferthion i deithwyr ar y ffyrdd, ac fel yn Abergwaun, amharu ar wasanaethau fferi.

Mae toriadau hefyd yn bosib i gyflenwadau trydan.

'Cadwch draw o'r arfordir'

Mae'r RNLI wedi rhybuddio pobl i gadw draw o ardaloedd arfordirol oherwydd y tywydd garw.

"Tra y gallai pobl fod eisiau profi tywydd eithafol ar hyd yr arfordir, ry'n ni'n cynghori'n gryf i beidio gwneud hynny," dywedodd eu Rheolwr Diogelwch Dŵr, Ross Macleod, brynhawn Mawrth.

"Dydy hi ddim yn werth peryglu'ch bywyd, felly ry'n ni'n annog pobl i barchu'r dŵr a gwylio o bellter diogel."