Pont Betws-y coed wedi bod ar gau "yn rhy hir"

Cafodd y bont grog ym Mhetws-y-coed ei chau ym mis Rhagfyr 2021

Mae busnesau a thrigolion Betws-y-coed yn dweud eu bod nhw'n rhwystredig gan fod pont grog enwog y pentref yn parhau i fod ar gau.

Ers degawdau, mae'r bont wedi bod yn llwybr diogel i groesi Afon Conwy - ond fe gafodd ei chau bron i flwyddyn a hanner yn ôl am resymau diogelwch.

Nos Wener cafodd cyfarfod cyhoeddus ei gynnal yn y pentref gyda'r aelod sy'n cynrychioli'r ardal yn y Senedd - Janet Finch-Saunders.

Mae Cyngor Conwy yn dweud bod y bont ynghau ar sail diogelwch a bod gwaith dylunio y prosiect i'w hailagor wedi dechrau.

"Effaith ar yr ardal"

Bu'n rhaid cau Pont y Soldiwr neu Sappers' Bridge ym mis Rhagfyr 2021 ar ôl i beirianwyr ganfod fod llawr pren y bont yn pydru.

Fe wnaeth arolygiadau pellach ddangos bod yna wendid gyda'r ceblau dur hefyd.

Ond mae ei cholli dros yr 16 mis diwethaf wedi cael effaith ar rai o berchnogion busnesau yn yr ardal.

Dywedodd Gareth Vaughan fod y bont yn atyniad twristiaeth pwysig

Un o'r rheini ydy Gareth Vaughan, perchennog gwesty ym Metws-y-coed.

Dywedodd: "Mae colli'r bont wedi cael effaith ar yr ardal, effaith ar fusnesau a thrigolion lleol. Ni'n un o sawl gwesty sydd ar yr ochr o'r afon sydd angen pont i'n cysylltu gyda chanol y pentref.

"Mae hefyd yn denu pobl i'r ardal. Yn y gorffennol mae pobl wedi rhoi lluniau o'r bont ar Instagram ac wedi sôn amdani ar Tripadvisor. Mae angen gwneud rhywbeth i gael hi nôl."

'Siom ei cholli'

Wrth i'r costau o'i hatgyweirio godi i dros £1m mae'r bont 93 oed yn parhau ar gau tra bod Cyngor Conwy yn ceisio dod o hyd i arian.

Ond yn ôl Alan, sy'n byw yn lleol, mae angen gweithredu nawr.

Mae Alan, sy'n byw'n lleol, yn cofio defnyddio'r bont pan oedd yn blentyn

"O'n i'n mynd drosti ers talwm - pan o'n i'n blentyn hyd yn oed," meddai.

"Yn amlwg mae wedi cau nawr a dim gwaith yn cael ei wneud. Dwi'n deall bod hi'n anodd o ran pres i gyngor y sir rŵan, ond mae'n siom bod ni wedi colli hon. Roedd y bont yn boblogaidd gyda thwristiaid a ni sy'n byw yma."

Teimla Llinos fod cau'r bont yn cael effaith mawr ar gerddwyr

I Llinos, sy'n gweithio mewn siop bapur newydd ym Metws-y-coed, mae colli'r bont wedi creu trafferth.

"Mae wedi bod yn niwsans i bobl leol a phobl sy'n hoff o gerdded. Roedd modd torri trwyddo wrth gerdded o Lanrwst i Fetws ers talwm ond nawr mae'n rhaid cerdded rownd sydd yn ychwanegu milltiroedd i'r daith."

"Ni allwn fforddio golli busnesau"

Er mwyn mynd i'r afael â rhwystredigaeth gynyddol pobl leol, fe wnaeth AS Aberconwy, Janet Finch-Saunders, gynnal cyfarfod cyhoeddus nos Wener i drafod y mater.

"Mae busnesau yn dweud wrthai eu bod yn llai prysur ac yn poeni am eu dyfodol. Allwn ni ddim fforddio colli'r busnesau hyn yma ym Metws-y-coed nag unrhyw le arall yn Aberconwy," meddai.

"Mae angen i'r bont gael ei thrwsio, a'i hailagor," medd yr AS Janet Finch-Saunders

"Mae hefyd wedi effeithio ar gerddwyr a phobl leol. Mae angen y bont hon arnom.

"Mae angen i ni weld y bont hon yn cael ei thrwsio, a'i hailagor ac yna bydd pawb yn hapus."

Mewn ymateb dywedodd Cyngor Conwy: "Mae Pont y Soldiwr ynghau ar hyn o bryd ar sail diogelwch gan fod yr estyll pren, cefnogaeth yr estyll, y prif geblau crog a'r tyrau i gyd angen eu newid. Mae'n rhaid tynnu y bont gyfan i lawr a'i hailadeiladu.

"Mae Cyngor Bwrdeistref Sirol Conwy wedi dechrau gwaith dylunio ar y prosiect hwn, gan gynnwys y dewis i ymestyn y dec ac uwchraddio i safonau modern. Mae arian wedi'i sicrhau drwy Gronfa Ffyniant Bro Llywodraeth y DU.

"Rydym yn disgwyl cael darluniadau cysyniadol ym mis Gorffennaf ac yna byddwn yn cynnal digwyddiad gwybodaeth yn y pentref.

"Rydym wedi ymchwilio i weld a oes unrhyw ffordd o agor y bont dros dro ond yn anffodus nid yw hyn yn bosibl oherwydd bod y prif geblau wedi eu condemnio."