Cyhoeddi rhybuddion llifogydd difrifol wedi Storm Babet

Mae rhybudd difrifol yn ei le ar gyfer ardal Llandrinio ym Mhowys

Mae rhybuddion llifogydd difrifol sy'n golygu "perygl i fywyd" wedi eu cyhoeddi ar gyfer pentrefi ar lannau dwy afon yn y canolbarth.

Cyhoeddodd Cyfoeth Naturiol Cymru (CNC) y rhybudd difrifol ar gyfer Llandrinio ym Mhowys, lle mae afonydd Hafren ac Efyrnwy yn cwrdd, gyda phryderon fod yr amddiffynfeydd lleol yn gorlifo.

Mae'r tywydd garw yn parhau i gael effaith wedi i Storm Babet achosi llifogydd yng nghanolbarth a gogledd Cymru.

Cafodd rhai cartrefi eu gorlifo ac aeth ceir yn sownd yn y llifogydd wrth i'r ffyrdd fynd yn amhosibl i yrru arnynt.

Mae rhybudd o lifogydd difrifol gan CNC yn cynghori pobl i "aros mewn lle diogel gyda modd o ddianc".

Roedd sawl ffordd yn parhau ar gau fore Sadwrn, yn bennaf yn Sir y Fflint, gyda 18 rhybudd o lifogydd yn eu lle ar draws Cymru.

Fe adawodd llifddwr dair mamog yn sownd ar fferm yn Llanfihangel Glyn Myfyr, Conwy, cyn i gi defaid nofio i'w hachub.

Mae'r afonydd Hafren ac Efyrnwy yn cwrdd yn Llandrinio

Roedd rhybudd gan Trafnidiaeth Cymru i deithwyr wirio cyn teithio ar rwydwaith Cymru a'r Gororau gyda "disgwyl i'r aflonyddwch barhau".

Nid oedd gwasanaethau Avanti West Coast yn gallu rhedeg rhwng Crewe a Chaergybi.

Dywedodd Cyfoeth Naturiol Cymru (CNC) fod y sefyllfa'n gwella ond bod "pryderon" yn parhau mewn cymunedau ger Afon Dyfrdwy ac Afon Hafren.

Ychwanegodd Ioan Williams, o CNC y gallai gymryd diwrnod i'r dŵr glaw o ardaloedd uwch i gyrraedd y llefydd sydd efo llifogydd.

• Storm Babet: Cyngor yn rhybuddio pobl i aros dan do

"Rydym wedi clywed am bobl sydd wedi mynd yn sownd yn eu ceir" meddai ar BBC Radio Wales Breakfast.

"Byddwch yn hynod o ofalus os ydych yn mynd allan."

Mae Afon Clwyd yn parhau i lifo'n uchel fore Sadwrn

Mae rhannau o'r Alban wedi cael ail rybudd coch "perygl i fywyd" gyda glaw difrifol a gwyntoedd cryfion ar draws y DU.

Yng Nghymru, cafodd rhybudd tywydd Met Office ei godi fore Sadwrn.

Mae Transport for Wales wedi rhybuddio teithwyr i wirio'r trefniadau cyn teithio ar y gwasanaeth sy'n rhedeg ar y ffîn rhwng Cymru a Lloegr ddydd Sadwrn.

Bydd modd i gwsmeriaid oedd â thocyn i deithio dydd Gwener eu defnyddio dros y penwythnos.

Roedd pobl wedi gorfod gadel eu cartrefi ac roedd nifer o ysgolion wedi'i gorfodi i gau, gan gynnwys 52 yn Sir y Fflint.

Mae Gwasanaeth Tan ac Achub Gogledd Cymru yn dweud bod dros 60 o adroddiadau o lifogydd wedi eu derbyn.

Roedd y rhain yn cynnwys rhannau o'r Wyddgrug a threfi yn Sir Ddinbych megis Prestatyn a'r Rhyl.

Mae Gwasanaeth Tan ac Achub Canolbarth a Gorllewin Cymru yn dweud bod y llifogydd wedi cadw'r staff yn "hynod o brysur" ddydd Gwener.

Dywedodd Bronwen Hughes, pennaeth Ysgol Maes Garmon yn Yr Wyddgrug, wrth Radio Wales Breakfast y bu'n rhaid iddi gau'r ysgol ddydd Gwener oherwydd difrifoldeb y llifogydd.

"Doedd o ddim yn ddewis hawdd ond roedd lefel y dŵr yn codi," meddai.

Dywedodd yr asiantaeth traffig a theithio, Inrix, fod y brif ffordd rhwng Wrecsam a'r Wyddgrug yn parhau ar gau oherwydd llifogydd ar yr A541 ym Mhontblyddyn ddydd Sadwrn.

Roedd yr A5 hefyd ar gau rhwng Llangollen a Froncysyllte.