Y Gweilch yn rownd 16 olaf Cwpan Her Ewrop

Owen Watkin yn croesi'r llinell i'r Gweilch

Mae'r Gweilch wedi sicrhau gêm gartref yn rownd 16 olaf Cwpan Her Ewrop ar ôl ennill 28-38 yn erbyn y Lions yn Ne Affrica ddydd Sul.

Daeth cais cyntaf y gêm ar ôl 16 munud wrth i'r Gweilch gipio'r bêl ynghanol cae gan greu lle i Owen Watkin groesi'r llinell.

Ond daeth ymateb yn syth gan y Lions wrth i'r capten Marius Louw fanteisio ar gic dros y top gan Sanele Nohamba.

George North oedd y nesaf i sgorio cais wedi i'r canolwr dorri ei ffordd trwy'r amddiffyn gan roi'r Gweilch ar y blaen o 8-14.

Yn 10 munud olaf yr hanner fe sgoriodd y tîm cartref ddau gais trwy Pretorious a Louw.

Daeth cais nesa'r gêm ar ôl ychydig dros chwarter awr o'r ail hanner gyda Morne van den Berg yn croesi'r llinell.

Roedd hi'n edrych fel bod y Lions yn rhuo eu ffordd i'r rownd nesaf ond roedd Keiran Williams yn dal yn llawn egni.

Fe lwyddodd ei rediad i ddarganfod yr asgellwr Keelan Giles i ddod a'r Gweilch yn ôl o fewn pedwar pwynt gyda saith munud i fynd.

Tair munud yn ddiweddarach, diolch i rediad da gan y prop Cameron Jones, cafodd y bêl ei phasio i Watkin a'i rhoddodd hi'n ôl i Jones i sgorio cais.

Gyda thair munud ar ôl roedd y cefnogwyr cartref yn syfrdan wrth i Morgan Morse ryng-gipio'r bêl a rhedeg 60 metr i'r llinell.

Ond ni fydd y Dreigiau yn mynd ymhellach yn y gystadleuaeth ar ôl colli o 9-29 yn erbyn y Sharks yng Nghasnewydd nos Sul.

Croesodd Jaden Hendrikse ac Ox Nche am geisiau i'r tîm o Dde Affrica yn yr hanner cyntaf i'w gwneud hi'n 6-12 ar yr egwyl.

Ond ymestyn wnaeth y fantais yn yr ail hanner wrth i Gerbrandt Grobler, Le Roux Roets a Werner Kok oll groesi er mwyn sicrhau na fyddai'r Dreigiau yn rownd yr 16 olaf.