Cymru'n cael gwybod eu grŵp rhagbrofol Euro 2025

Dyw tîm merched Cymru erioed wedi cyrraedd pencampwriaethau Ewrop

Bydd tîm pêl-droed merched Cymru yn yr un grŵp â Croatia, Wcráin a Kosovo ar gyfer rowndiau rhagbrofol Euro 2025.

Cafodd yr enwau eu tynnu o'r het yn y Swistir ddydd Mawrth.

Hon fydd ymgyrch gyntaf Rhian Wilkinson fel rheolwr, wedi iddi gael ei phenodi fel olynydd i Gemma Grainger.

Cymru yw'r uchaf ar restr detholion FIFA yn y grŵp.

Mae Cymru yn brif ddetholion yng Nghynghrair B, gyda phedwar grŵp o bedwar.

Os bydd Cymru yn gorffen yn y tri safle uchaf yn y grŵp, yna mi fyddan nhw'n sicrhau gêm ail-gyfle.

Bydd y gemau yn cael eu cynnal rhwng mis Ebrill a Gorffennaf, gyda'r rowndiau terfynol yn y Swistir ym mis Gorffennaf 2025.

Dywedodd Rhian Wilkinson y bydd hi'n treulio'r wythnosau nesaf yn dod i wybod mwy am y gwrthwynebwyr

Yn siarad gyda BBC Cymru yn ddiweddarach dywedodd Wilkinson: "Mae yna dimau cryf yna, a thimau nad ydym yn gwybod gormod amdanynt.

"'Da ni erioed wedi wynebu Kosovo. Mae yna lawer o waith i'w wneud ar yr holl dimau.

"A bod yn onest dydw i ddim yn gwybod gormod am y gwrthwynebwyr, ond fel hyfforddwr dyma lle mae'r gwaith caled yn dechrau.

"Felly dyma sut y bydda i'n treulio'r wythnosau nesaf yn gwneud yn siŵr mod i'n adnabod y gwledydd yma."