Cyhoeddi enw dyn 48 oed fu farw yng Nghaerdydd
- Cyhoeddwyd
Roedd Colin Richards yn 48 oed ac yn dod o ardal Grangetown
Mae Heddlu De Cymru wedi cyhoeddi enw dyn a fu farw yn dilyn digwyddiad yng Nghaerdydd nos Sul.
Roedd Colin Richards yn 48 oed ac yn dod o ardal Grangetown y brifddinas.
Cafodd y gwasanaethau brys eu galw i'r digwyddiad yn ardal Heol-y-Berllan a Heol Trelái, Caerau, toc wedi 23:30 nos Sul.
Mae tair menyw, dwy 43 oed ac un 28 oed, a gafodd eu harestio ar amheuaeth o lofruddio, bellach wedi cael eu rhyddhau dan ymchwiliad.
Wrth roi teyrnged iddo, dywedodd ei deulu fod Mr Richards yn "dad, taid, brawd, ewythr a chefnder cariadus, ac yn ddyn teulu".
"Bydd yn ein meddyliau a'n calonnau am byth".
Mae'n gadael saith plentyn.
Mae'r heddlu yn dal i apelio am wybodaeth.