Adolygiad: Rhybudd cadeirydd adolygiad

Mae Eurfyl ap Gwilym yn feirniadol iawn o rai ymgeiswyr a llefarwyr Plaid Cymru

Mae angen i rai o wleidyddion Plaid Cymru wella'u perfformiad fel llefarwyr polisi, yn ôl cadeirydd adolygiad.

Dywedodd Eurfyl ap Gwilym fod rhai ymgeiswyr y blaid wedi perfformio'n siomedig cyn Etholiad y Cynulliad y llynedd.

Cafodd adolygiad ei gomisiynu wedi i'r blaid golli seddau yn y Senedd fis Mai a nhw oedd y drydedd blaid tu ôl i Lafur a'r Ceidwadwyr.

Mae angen i rai o fewn y blaid "dorchi llewys", meddai.

Dywedodd ei adolygiad fod "gormod o lefarwyr y blaid heb y gallu na'r hyder i gyflwyno ein polisïau".

Ychwanegodd y dylai "fod yn amod eu bod yn datblygu dealltwriaeth lawn o'u pwnc eu hunain ond hefyd yn cael eu briffio am ystod lawn polisïau'r blaid".

'Perfformiadau gwan'

Ar raglen Dragon's Eye BBC Cymru dywedodd: "Rwy'n feirniadol iawn o rai ymgeiswyr ac mae perfformiadau rhai llefarwyr ar rai pynciau wedi bod yn wan.

Nid oedd yn fodlon enwi neb ond dywedodd: "Maen nhw'n gwybod pwy ydyn nhw.

"Yn sicr, mae angen iddyn nhw dorchi llewys neu ddylen nhw ddim bod yn ymgeiswyr nac yn llefarwyr."

Arweinydd

Mae ei adolygiad yn cynnwys 95 o argymhellion ac awgrym y dylai'r blaid newid ei enw Saesneg i'r Welsh National Party er mwyn chwalu'r ddelwedd mai plaid i siaradwyr Cymru yn unig ydyw.

Daw'r adroddiad wrth i'r blaid chwilio am arweinydd newydd yn lle Ieuan Wyn Jones.

Cyhoeddodd yntau y byddai'n ildio'r arweinyddiaeth wedi canlyniadau siomedig Plaid Cymru mewn dau etholiad.

Mae pedwar Aelod Cynulliad yn y ras i'w olynu. Bydd y rhestr enwebiadau yn cau ar Ionawr 26.