Pryder am gost tân y llyfrgell

Gallai'r gost o atgyweirio'r llyfrgell fod yn £5m

Fe fydd yn costio tua £5 miliwn er mwyn atgyweirio'r Llyfrgell Genedlaethol yn dilyn tân yno fis diwethaf.

Fe gafodd to'r adeilad ei ddifrodi'n sylweddol.

Mae rheolwyr yn Aberystwyth mewn trafodaethau gyda chwmnïau yswiriant a Llywodraeth Cymru am y bil.

Mae'n dilyn ymchwiliad lle canfuwyd bod y tân wedi ei gynnau'n ddamweiniol drwy weithwyr yn defnyddio lamp losgi.

Yn y cyfamser bydd rhestr o'r eitemau a ddinistriwyd yn cael ei chyflwyno i fwrdd ymddiriedolwyr y Llyfrgell yr wythnos nesaf.

Cafodd rhai darnau o gasgliad hanesyddol a gafodd ei ddifrodi gan ddŵr a ddefnyddiwyd i ddiffodd y tân eu symud i Rydychen gan dîm o arbenigwyr.

'Disgwyl asesiad'

Dywedodd Arwel Jones, cyfarwyddwr gwasanaethau cyhoeddus y Llyfrgell: "Yr amcangyfrif ar hyn o bryd yw rhwng £4 a £5 miliwn.

"Fe fyddwn ni'n holi'r cwmnïau yswiriant, ond rydym yn siarad â Llywodraeth Cymru hefyd."

Eisoes mae Gweinidog Treftadaeth wedi addo cefnogaeth i'r llyfrgell mewn "cyfnod anodd".

Fe welodd John Griffiths y difrod ar ymweliad diweddar â'r llyfrgell.

Ddydd Iau dywedodd llefarydd ar ran Llywodraeth Cymru eu bod yn disgwyl i gael gweld maint y difrod, gan ddweud:

"Rydym yn ymwybodol bod Gwasanaeth Tân ac Achub Gorllewin a Chanolbarth Cymru wedi cyhoeddi datganiad ynglŷn â'r tân yn Llyfrgell Genedlaethol Cymru ac achos tebygol y tân.

"Rydym yn disgwyl am asesiad o'r difrod i'r adeilad a'r casgliadau oedd ynddo gan arbenigwr.

"Rhaid cael y wybodaeth yma cyn y gallwn ni gadarnhau cyfrifoldeb ariannol. Mae swyddogion Llywodraeth Cymru yn cadw mewn cysylltiad agos â'r llyfrgell wrth iddo barhau i reoli ac ymateb i'r digwyddiad yma."