'Yr atyniad antur mwya'

Mae cynllun newydd yn anelu at droi Gogledd Cymru yn brif gyrchfan gwyliau antur y DU.

Gweledigaeth Partneriaeth Twristiaeth Gogledd Cymru yw cynllun Calon Antur.

Mae'r sector eisoes yn cyflogi dros 8,500 o bobl ac yn dod â £150 miliwn y flwyddyn i economi'r gogledd.

Ond mae'r bartneriaeth yn credu bod modd creu 'brand' fyddai'n codi'r gogledd i fod yn un o'r pum brif gyrchfan i ymwelwyr yn y DU - a'r uchaf o blith pobl sy'n chwilio am wyliau antur.

'Un llais'

Dywedodd cyfarwyddwr y bartneriaeth Dewi Davies: "Mae'r diddordeb mewn gweithgareddau antur awyr agored wedi tyfu'n gyson, boed hynny'n bobl yn dod am benwythnos neu'r rhai sy'n chwilio am antur.

Cwmni Zip World yn Nyffryn Ogwen oedd y cyntaf i ymuno â'r cynllun

"Ein teimlad ni oedd y byddai gweithio gyda busnesau ac atyniadau, siarad gydag un llais, yn dangos beth sydd gan Gogledd Cymru i'w gynnig."

Nod y bartneriaeth yw perswadio 50 o fusnesau sy'n gweithio yn y sector yn y gogledd i ymuno gyda'r cynllun, yn ogystal â phump o ddigwyddiadau yn y calendr gweithgareddau awyr agored.

Oherwydd hynny mae 25 o swyddi newydd yn cael eu creu a £500,000 o incwm i'r rhanbarth.

Un o'r cwmnïau cyntaf i ymuno oedd Zip World ym Methesda, Gwynedd, sef y wifren wibio hiraf yn Ewrop.

'Heriol'

Cafodd Calon Antur ei lansio mewn derbyniad cwmni offer dringo DMM yn Llanberis.

Maen nhw'n cynhyrchu offer dringo sy'n cael eu hallforio o amgylch y byd a dywedodd eu rheolwr allforio Ben Slack fod y gogledd yn cynnig rhywbeth unigryw i ddringwyr.

"Mae'r graig yma yn anhygoel," meddai. "Mae'n arbennig os ydych chi'n edrych ar y llechen, clogwyni neu'r tywodfaen.

Dywedodd Ben Slack bod dringo yn y gogledd yn "heriol iawn"

"Mae'n heriol iawn ac yn ddim byd tebyg i'r hyn gewch chi ar dir mawr Ewrop, er enghraifft.

"Wrth gwrs, mae gan y gogledd fwy na hynny i'w gynnig - mae beicio mynydd, canŵio, cerdded neu bethau anturus eraill ac rwy'n credu bod y bartneriaeth wedi gwneud y peth iawn i greu'r brand Calon Antur."

Ychwanegodd Mr Davies: "Rhaid i ni sicrhau ein bod nid yn unig yn cynnig croeso cynnes ond yn cynorthwyo pobl i arbrofi gyda'r ystod eang o weithgareddau antur yr ydym yn eu cynnig.

"Y neges yw bod Gogledd Cymru'n unigryw - mae'n ganolog, popeth yn agos at ei gilydd ac mae'n wlad wahanol gyda gwahaniaethau diwylliannol i'w mwynhau hefyd."