Nawdd i bymtheg cylchgrawn Cymraeg
- Cyhoeddwyd
Mae Cyngor Llyfrau Cymru wedi cyhoeddi pa gylchgronau Cymraeg fydd yn derbyn cefnogaeth ariannol dros gyfnod y drwydded nesaf o fis Ebrill 2016.
Pymtheg cylchgrawn fydd yn derbyn arian gyda'r symiau'n amrywio o £80,000 y flwyddyn (Barn) i £1,500 (Fferm a Thyddyn).
Daeth penderfyniad y panel fu'n dewis a dethol y cylchgronau sy'n elwa yn dilyn arolwg o'r maes cylchgronau Cymraeg.
Dywedodd cadeirydd y panel, yr Athro Gerwyn Williams o Brifysgol Bangor: "Rydym fel Panel yn hynod o falch o ganlyniad y broses a chredwn fod nawdd y Cyngor Llyfrau wedi llwyddo i gefnogi ystod eang ac amrywiol o gyhoeddiadau.
"Mewn cyfnod anodd o ran cyllido a gwerthiant cylchgronau'n gyffredinol mae'n braf gweld y diwydiant yn ymateb gyda syniadau newydd sbon a pharodrwydd i ymateb i her y byd digidol."
'Portffolio eang'
Bydd tri chyhoeddiad gan gwmni Golwg yn derbyn cyfanswm o £121,000 y flwyddyn dros y tair blynedd nesaf, sef Golwg (£73,000), WCW (£30,000) a Lingo (£18,000).
Cylchgrawn Barn sy'n derbyn y swm mwyaf o £80,000 y flwyddyn tra bod cynyrchiadau fel CIP (£27,500) a Barddas (£24,000) hefyd yn derbyn arian sylweddol.
"Mae cael portffolio eang o gylchgronau yn sylfaenol i gynnal diwylliant hyfyw ac yn gyfraniad uniongyrchol i ledaenu defnydd o'r iaith," meddai Elwyn Jones, Prif Weithredwr Cyngor Llyfrau Cymru.
"Mae'r cylchgronau hefyd yn cynnig cyfle i ymdrin â phynciau amrywiol drwy'r Gymraeg ac i hybu trafodaeth am faterion y dydd."
Pwysleisiodd y Cyngor Llyfrau bod dau syniad newydd sbon wedi cael nawdd, sef Melin - menter ddigidol i grynhâi a dosbarthu newyddion cyfoes sy'n derbyn £5,000 y flwyddyn - a Mellten, sy'n gomic i blant a phobl ifanc fydd yn cael ei greu gan y cartwnydd Huw Aaron.
Bydd cyfnod y trwyddedau newydd yn dechrau ar 1 Ebrill, 2016.
Dyma'r 15 cyhoeddiad fydd yn derbyn arian dros y tair blynedd nesaf:
Barn - £80,000 y flwyddyn
Golwg - £73,000
WCW - £30,000
CIP - £27,500
Barddas - £24,000
Lingo - £18,000
Y Cymro - £18,000
Mellten - £14,000
Y Wawr - £10,000
Y Selar - £10,000
Llafar Gwlad - £7,000
Y Traethodydd - £6,000
Melin - £5,000
Cristion - £4,800
Fferm a Thyddyn - £1,500