Marwolaethau SAS: Diffyg erlyniad yn 'hynod siomedig'
- Cyhoeddwyd
Roedd yr Is-gorporal Craig Roberts yn un o dri milwr fu farw
Mae rhieni un o'r tri milwr fu farw ar Fannau Brycheiniog wedi dweud eu bod yn "hynod siomedig" na fydd y llywodraeth yn caniatáu erlyniad yn erbyn y Weinyddiaeth Gyfiawnder.
Bu farw'r Is-gorporal Craig Roberts a dau arall ar hyfforddiant yr SAS ym Mhowys yn 2013.
Dywedodd y llywodraeth na fyddai caniatáu achos cyfreithiol yn gwella diogelwch.
Ond mae Kelvin a Margaret Roberts yn dweud eu bod yn credu y byddai'r fyddin yn fwy cyfrifol pe bai cyfrifoldeb cyfreithiol.
'Hynod siomedig'
Ym mis Mawrth, cafodd y Weinyddiaeth Gyfiawnder gerydd am y methiannau wnaeth arwain at farwolaethau'r Is-gorporal Roberts o Fae Penrhyn, y Corporal James Dunsby o Wiltshire a'r Is-gorporal Edward Maher o Hampshire.
Yn y cwest i'w marwolaethau, dywedodd crwner bod esgeulustod wedi cyfrannu at eu marwolaethau.
Fe wnaeth yr Awdurdod Gweithredol Iechyd a Diogelwch gyhoeddi'r cerydd uchaf sy'n bosib, gan nad oes modd erlyn y Weinyddiaeth Gyfiawnder.
Mae'r weinyddiaeth wedi ymddiheuro am y methiannau.
Gyda'r Is-gorporal Roberts oedd y Corporal James Dunsby a'r Is-gorporal Edward Maher
Ond wrth ymateb i adroddiad gan Bwyllgor Dethol Amddiffyn Tŷ'r Cyffredin, fe wnaeth Llywodraeth y DU wrthod newid y ddeddf Dynladdiad Corfforaethol o 2007.
Dywedodd Mr a Mrs Roberts: "Rydyn ni'n hynod siomedig bod y llywodraeth wedi penderfynu peidio derbyn argymhelliad y... pwyllgor i gael gwared ar freintryddid y Weinyddiaeth Gyfiawnder pan maen nhw'n cael cerydd.
"Mae'r llywodraeth yn dweud eu bod yn methu gweld sut y byddai tynnu'r breintryddid yn gwella safonau hyfforddiant milwrol, ond, rydyn ni'n credu pe bai'r weinyddiaeth yn gyfrifol yn gyfreithiol yna y byddan nhw'n fwy cyfrifol a diwyd wrth hyfforddi."
Ychwanegon nhw eu bod yn "falch bod y Pwyllgor Amddiffyn yn bwriadu parhau eu diddordeb yn y mater gyda'r weinyddiaeth".
Roedd y tri dyn ar hyfforddiant ar un o ddiwrnodau poethaf 2013 pan gawson nhw eu taro'n wael.
Daeth y cwest i ganlyniad eu bod wedi marw o orboethi, a dywedodd y crwner bod perygl o fwy o farwolaethau os nad oedd newid.
Daeth ymchwiliad yr Awdurdod Gweithredol Iechyd a Diogelwch i'r canlyniad bod y weinyddiaeth wedi methu a chynllunio, asesu a rheoli'r risgiau ynghlwm a'r hyfforddi.