Cymru i ddechrau ymgyrch 2018 yn Stadiwm Dinas Caerdydd

Stadiwm Dinas Caerdydd fydd cartref tîm pêl-droed Cymru ar gyfer eu tair gêm gyntaf yn ngemau rhagbrofol Cwpan y Byd 2018.

Mae'r Gymdeithas Bêl-droed wedi cadarnhau na fydd y tîm cenedlaethol yn symud o'r stadiwm am y tro.

Roedd y rheolwr, Chris Coleman, wedi wfftio'r syniad o symud i Stadiwm y Principality yn dilyn awgrym y gallai hynny ddigwydd gan Brif Weithredwr y gymdeithas.

Yn ôl Jonathan Ford roedd defnyddio'r safle yng nghanol y brifddinas, sy'n dal 72,000 o gefnogwyr, yn opsiwn.

Ond mae cadarnhad erbyn hyn y bydd y gemau yn erbyn Moldova, Georgia a Serbia yn cael eu cynnal yn Stadiwm Dinas Caerdydd, sy'n dal 33,000.

Chwaraeodd y tîm pêl-droed yng nghartref rygbi Cymru am y tro cyntaf yn 2000

Dyw'r gymdeithas heb gadarnhau ble fydd y gemau yn erbyn Awstria a Gweriniaeth Iwerddon yn cael eu cynnal.

Mae Ford wedi dweud y bydd Cymru'n chwarae gêm yn Stadiwm y Principality cyn i'r lleoliad gynnal rownd derfynol Cynghrair y Pencampwyr 2017.

Ond mae wedi awgrymu hefyd y gall honno fod yn gêm gyfeillgar.

Y tro diwethaf i Gymru chwarae yng nghartref rygbi Cymru oedd yn erbyn Lloegr yn 2011, gan golli o 2-0.

Bydd tîm Chris Coleman yn dechrau gemau rhagbrofol 2018 yn erbyn Moldova ar 5 Medi cyn wynebu Georgia ar 9 Hydref a Serbia ar 12 Tachwedd.