Cyhoeddi 'adroddiad cymysg' i Garchar Caerdydd
- Cyhoeddwyd
Mae Carchar Caerdydd yn dal tua 770 o ddynion ac yn garchar Categori B
Mae angen i Garchar Caerdydd "ganolbwyntio ar welliant tymor hir", yn ôl adroddiad diweddar gan y Prif Arolygwr Carchardai.
Mewn ymweliad dirybudd â'r carchar yn ystod yr haf fe sylwodd Peter Clarke fod y carchar wedi dod yn le "llai diogel" ers yr arolygiad diwethaf yn 2013.
Ond mae'n nodi bod y carchar yn parhau'n "sefydlog dan oruchwyliaeth staff ymroddgar".
Mae'r gwaith o addysgu troseddwyr i addasu'n ôl i mewn i gymdeithas wedi gwella, yn ôl yr adroddiad.
'Gormod o gyffuriau'
Mae'r arolygwyr yn pwysleisio fod angen i'r carchar "wneud mwy i atal y dosbarthiad o gyffuriau anghyfreithlon" a bod y troseddwyr yn "treulio gormod o amser yn eu celloedd".
Roedd yr arolygwyr yn hapus i weld fod y berthynas rhwng y troseddwyr a staff y carchar yn dda a bod 'na ddigon o gyfleoedd addysgiadol i'r carcharorion.
Dywedodd Prif Swyddog Gweithredol y Gwasanaeth Cenedlaethol Rheoli Troseddwyr, Michael Spur: "Dwi'n falch fod yr arolygwyr wedi canmol gwaith y staff yng Ngharchar Caerdydd.
"Mae mwy i'w wneud ac mae 'na gynlluniau eisoes ar droed i wella diogelwch o fewn y carchar, gan gynnwys penodi rheolwr lleihau trais."
Mae carchar Caerdydd yn dal oddeutu 770 o ddynion ac yn cael ei ystyried yn garchar categori B.