Cyhoeddi dilyniant i ffilm Twin Town
- Cyhoeddwyd
Rhys Ifans a'i frawd Llyr oedd y prif gymeriadau yn y ffilm wreiddiol
Mae'r gwaith wedi cychwyn ar ddilyniant i ffilm Twin Town meddai'r cyfarwyddwr.
Fe roddodd Kevin Allen lun o fraslun sgript ar Facebook.
Dywedodd: "Roedd yn rhaid i rai ohonom ni weithio dros gyfnod y Nadolig a'r flwyddyn newydd."
Dywedodd hefyd bod disgwyl i'r gwaith ffilmio ddechrau ym mis Mehefin, o bosib yn ardal Llanelli.
Ym mis Rhagfyr fe ddywedodd un o actorion Twin Town, Rhys Ifans fod yna "ffilm Gymraeg" ar y gweill.
Cafodd y ffilm, oedd wedi ei lleoli yn Abertawe, ei chyhoeddi bron i 20 mlynedd yn ôl.
Mae Mr Allen, gafodd ei fagu yn y ddinas, wedi dweud yn y gorffennol ei fod eisiau ail ymweld â rhai o'r cymeriadau yn y ffilm wreiddiol.