Cwestiynu 'tryloywder' S4C a phrifysgol dros Yr Egin

Mae cwestiynau ynglŷn â "thryloywder" a "niwl" o amgylch y berthynas rhwng S4C a'r brifysgol fydd yn bencadlys newydd i'r sianel, yn ôl aelod seneddol.

Mae S4C yn bwriadu symud i adeilad Yr Egin ym Mhrifysgol Cymru Y Drindod Dewi Sant y flwyddyn nesaf, gan symud 55 o aelodau staff o Gaerdydd i Gaerfyrddin.

Maen nhw wedi cytuno i dalu £3m mewn rhent i'r brifysgol ymlaen llaw, sy'n cyfateb i £150,000 y flwyddyn. Mae'r Coleg Cymraeg Cenedlaethol yn talu rhent o £26,000 y flwyddyn i'r brifysgol am adeilad ger Yr Egin.

Yn ôl S4C a'r brifysgol nid oes modd gwneud cymhariaeth rhwng sefyllfa'r darlledwr a'r Coleg Cymraeg Cenedlaethol.

• 'Dim sail i ariannu pencadlys S4C'

• Pencadlys S4C: Cais am fwy o arian

Yn ôl ffigyrau sydd wedi dod i law BBC Cymru, ddaeth yn dilyn cais rhyddid gwybodaeth, mae'r Coleg Cymraeg Cenedlaethol yn talu £26,000 mewn rhent yn flynyddol i'r brifysgol.

Mae ganddyn nhw 20 aelod o staff mewn adeilad hŷn ger datblygiad Yr Egin.

'Amheus'

Dywedodd AS Gogledd Caerdydd, Craig Williams wrth raglen Newyddion 9: "Byddaf yn siarad â chadeirydd y Pwyllgor Materion Cymreig, yr wyf yn meddwl y byddwn yn eu galw nhw [Prifysgol Cymru Y Drindod Dewi Sant] i mewn i siarad am drefniadau y datblygiad cyfan a'r gwahaniaeth rhwng y swyddfeydd.

"Mae'n gwestiwn o dryloywder, mae tipyn o niwl o gwmpas y datblygiad hwn.

"Yr ydym wedi ei weld yn y cais i Lywodraeth Cymru am grant, ac eto ar yr un pryd sicrwydd i S4C nad oes angen iddynt [gael] grant i allu symud ymlaen. Rydym wedi ei weld gydag un taliad rhent ymlaen llaw o £3m.

"Byddai'r person mwyaf gwrthrychol yn edrych ar hyn yn amheus.

"Hefyd mae yna wahaniaeth rhwng y rhent ar gyfer y Coleg Cymraeg drws nesaf, sydd rhaid cyfaddef hanner maint [S4C] ond yn sicr, nid hanner y taliad."

Dywedodd llefarydd ar ran S4C na ellir gwneud cymhariaeth â sefyllfa'r Coleg Cymraeg Cenedlaethol.

"Mae'r swm mae'r Coleg yn ei dalu ar gyfer swyddfeydd sy'n 12 mlynedd oed ac am y cyfnod presennol," meddai.

"Mae'r hyn mae S4C yn bwriadu ei dalu ar gyfer yr 20 mlynedd nesaf ac ar gyfer swyddfeydd o safon uchel, fydd yn rhoi sicrwydd, di-risg i S4C."

Ychwanegodd bod gan y darlledwr gynllun busnes am 20 mlynedd sy'n "gost-niwtral", a bod modd ymestyn i les 25 mlynedd heb gost ychwanegol.

"Ni fydd unrhyw adolygiadau rent ar draws y cyfnod o dan y trefniant yma. Roedd y prisiau a gytunwyd yn unol â barn y Prisiwr Dosbarth am werthoedd renti yng Nghaerfyrddin."

Penderfyniad llywodraeth

Yn ôl llefarydd ar ran Prifysgol Cymru Y Drindod Dewi Sant: "Ni ellir cymharu sefyllfa tenantiaid y Llwyfan ac S4C - mae'r ddau adeilad yn wahanol iawn o ran natur ac oedran.

"Mae'r Brifysgol yn cadarnhau fod y rhentiau fesul troedfedd sgwâr wedi'u meincnodi yn erbyn costau rhent yn ardal Caerfyrddin."

Bydd Llywodraeth Cymru yn penderfynu'n ddiweddarach yn y mis a fydda' nhw'n cyfrannu hyd at £6m i'r cynllun.