Esgob Llandaf: Dim penodiad wedi tridiau o drafod
- Cyhoeddwyd
Mae coleg etholiadol yr Eglwys yng Nghymru wedi methu â chytuno ar bwy fydd esgob newydd Llandaf.
Ar ôl cyfarfod am dridiau daeth datganiad gan yr Eglwys yn dweud: "Ni chafodd yr un o'r ymgeiswyr dan sylw y nifer o bleidleisiau angenrheidiol i gael ei ethol, sef dwy ran o dair o fwyafrif.
"O dan amodau Cyfansoddiad yr Eglwys yng Nghymru mae'r cyfrifoldeb o ddewis esgob newydd felly'n disgyn ar ysgwyddau Mainc yr Esgobion."
Dywedodd Llywydd y Coleg Etholiadol - Esgob Abertawe ac Aberhonddu, y Gwir Barchedig John Davies - y bydd y broses sy'n arwain at benodi yn y pen draw yn cynnwys ymgynghoriad eang o glerigwyr a lleygwyr ar draws yr Eglwys yng Nghymru.
Fe ddaw'r broses yn dilyn ymddeoliad y Parchedicaf Barry Morgan ar 31 Ionawr ar ôl 17 mlynedd yn y swydd.
Dyma'r ail waith yn unig i'r Eglwys yng Nghymru fethu â dod i benderfyniad wrth ddewis esgob newydd, a hynny yn dilyn methiant i gytuno ar esgob newydd i Fangor yn 2004.
Chwe wythnos yn ddiweddarach fe benderfynodd mainc yr esgobion benodi Anthony Crockett - oedd yn ddewis dadleuol ar y pryd gan ei fod wedi ysgaru ac ailbriodi.
