Geraint Thomas allan o'r Tour de France wedi damwain
- Cyhoeddwyd
Geraint Thomas (dde) a Chris Froome (chwith) oedd yn arwain y Tour cyn y ddamwain ddydd Sul
Mae'r Cymro cyntaf i wisgo'r crys melyn yn y Tour de France wedi cael ei orfodi i adael y ras wedi iddo gael damwain yng nghymal naw.
Fe ddisgynnodd Geraint Thomas o dîm Sky oddi ar ei feic wrth ddod lawr disgyniad serth ddydd Sul.
Yn dilyn yr wythfed cymal, roedd Thomas yn parhau i fod yn yr ail safle.
Fe dorrodd Thomas bont ei ysgwydd yn y digwyddiad ar Col de la Biche.
Thomas yw'r cyntaf o Gymru i wisgo'r crys melyn
Thomas enillodd gymal cyntaf y Tour De France eleni ac fe gadwodd y crys melyn tan i Chris Froome - hefyd o Sky - ei gipio oddi arno ar ôl cymal pump.
Cwymp dydd Sul oedd y pumed i Thomas yn y Tour - fe gwympodd e hefyd yn yr ail gymal ac yng nghymalau pedwar ac wyth.
Fe gafodd e ddamwain arall ym mis Mai yn y Giro d'Italia a gorfod rhoi gorau i'r ras.
Bydd ei absenoldeb yn ergyd i Froome sy'n ceisio ennill ei drydedd fuddugoliaeth o'r bron yn y Tour a'i bedwerydd teitl.
Ddydd Sul yn Velothon Cymru yng Nghaerdydd a'r cyffiniau, roedd 'na anogaeth i seiclwyr wisgo lliw melyn i gydnabod camp Thomas i fod y Cymro cyntaf i wisgo'r crys melyn.