'Dadl dda' dros gadw pwerau yn San Steffan wedi Brexit
- Cyhoeddwyd
David Jones yw'r AS Ceidwadol dros Orllewin Clwyd
Mae "dadl dda" dros gadw rhai pwerau sydd gan yr UE ar hyn o bryd gyda Llywodraeth y DU yn hytrach na Llywodraeth Cymru, yn ôl cyn-weinidog cabinet.
Ar hyn o bryd, mae'r ddwy lywodraeth yn anghytuno dros beth fydd yn digwydd i bwerau fel cymorthdaliadau ffermwyr a chymorth economaidd rhanbarthol pan fydd Prydain yn gadael yr Undeb Ewropeaidd.
Mae amaeth a datblygu economaidd yn feysydd sydd yn cael eu rheoli gan Lywodraeth Cymru, ac mae gweinidogion ym Mae Caerdydd eisiau i rymoedd yr UE yn y meysydd hynny gael eu trosglwyddo'n syth iddyn nhw.
Ond mae Llywodraeth y DU yn bwriadu cadw'r pwerau dros dro, cyn penderfynu ar ddatrysiad hir dymor.
'Ras i'r gwaelod'
Dywedodd David Jones, sydd yn gyn-Ysgrifennydd Cymru, wrth BBC Cymru fod achos dros gadw rhai materion fel rhan o gyfrifoldebau'r DU gyfan.
"Mae'r undebau ffermwyr, gan gynnwys y rhai yng Nghymru, yn cydnabod fod angen fframwaith DU-gyfan ar gyfer polisi amaethyddol unwaith 'dyn ni'n gadael yr Undeb Ewropeaidd," meddai.
"Fel arall dwi'n meddwl y bydden ni'n cael ras i'r gwaelod o ran amaeth rhwng ardaloedd datganoledig gwahanol y wlad.
"Felly dwi'n meddwl fod dadl dda dros ddweud y dylai rhai pwerau aros ar lefel DU fel bod modd eu defnyddio'n iawn.
Mae amaeth yn un o'r meysydd ble mae anghytuno ynglŷn â phwerau wedi Brexit
"Bydd eraill yn cael eu pasio i'r sefydliadau datganoledig a dwi'n meddwl mai'r hyn sydd angen i ni wneud yw sicrhau fod Llywodraeth y DU yn gweithio gyda'r sefydliadau datganoledig er mwyn sicrhau'r lefel cywir ar gyfer bob pŵer penodol."
Yr wythnos diwethaf fe ddywedodd y Prif Weinidog, Carwyn Jones fod "peth ffordd i fynd" cyn bod Llywodraeth Cymru'n gallu cefnogi'r mesur i symud cyfreithiau'r UE i San Steffan.
Mynegodd bryder y byddai pwerau ar faterion datganoledig yn cael eu symud o Frwsel i Lundain ar ôl Brexit, heb sicrwydd y byddan nhw'n symud wedyn i'r Cynulliad.
Dywedodd Ysgrifennydd Cymru, Alun Cairns, fod "mwy o bwerau'n sicr o ddod i Gymru" wedi'r broses.