Webb yn gadael y nyth i ymuno â Toulon
- Cyhoeddwyd
Fe wnaeth Rhys Webb chwarae ei gêm gyntaf i'r Gweilch yn 2007
Fe fydd mewnwr Cymru Rhys Webb yn gadael y Gweilch ac yn ymuno â Toulon ar gytundeb tair blynedd ar ddiwedd y tymor.
Mae cytundeb presennol y chwaraewr 28 oed gyda'r Gweilch ac Undeb Rygbi Cymru yn dod i ben yr haf nesa.
Mae'n ergyd arall i'r Gweilch ar ôl y newyddion fod y maswr Dan Biggar wedi cyhoeddi y bydd yn ymuno â Northampton y tymor nesa.
Fe gafodd Webb ei gêm gyntaf i'r Gweilch yn 2007, gan gynrychioli Cymru am y tro cyntaf yn 2012 fel eilydd yn erbyn yr Eidal ym Mhencampwriaeth y Chwe Gwlad.
Mae wedi ennill 28 cap i Gymru, ond fe all ei benderfyniad i symud i Ffrainc beryglu ei ddyfodol rhyngwladol.
Yn ôl polisi Undeb Rygbi Cymru, dros y ddwy flynedd nesa dim ond pedwar chwaraewr sy'n chwarae y tu allan i Gymru fydd yn gallu cael eu dewis i'r tîm cenedlaethol.
Fe fydd y cwota yn gostwng i ddau chwaraewr ar gyfer tymor 2019/20.