George North i ddychwelyd i chwarae yng Nghymru

Mae George North wedi chwarae dros Northampton ers bron i bum mlynedd

Bydd George North yn gadael tîm rygbi Northampton ar ddiwedd y tymor presennol, er mwyn dod yn ôl i Gymru.

Cadarnhaodd Undeb Rygbi Cymru ei fod wedi cytuno i ddychwelyd ar gytundeb deuol.

Mewn datganiad, dywedodd clwb Northampton Saints eu bod yn "siomedig o golli chwaraewr o safon" North, ond eu bod yn deall ei bendefyniad i symud yn ôl i Gymru, i fod yn agosach i'w gartref.

Symudodd North, 25 oed, o'r Scarlets i Northmapton bron i bum mlynedd yn ôl.

Mae e wedi ennill 69 cap dros Gymru ers ei gêm gyntaf yn 2010.

"Mae hwn wedi bod yn benderfyniad anodd tu hwnt," meddai North.

"Mae'r Seintiau wedi fy natblygu i fel chwaraewr ac wedi aros yn driw i mi drwy amseroedd caled, felly gyda chalon drom iawn yr ydw i wedi penderfynu symud ymlaen."

Dywedodd Prif Hyfforddwr Cymru, Warren Gatland, y bydd penderfyniad o fewn y misoedd nesaf ar ba ranbarth y bydd North yn ymuno â nhw.