Marwolaethau A487: 200 mewn gwylnos i gofio dynes a babi

Roedd tua 200 o bobl yn y digwyddiad ym Mhorthmadog

Mae tua 200 o bobl wedi bod mewn gwylnos ym Mhorthmadog i gofio am ddynes a babi fu farw wedi gwrthdrawiad difrifol yng Ngwynedd.

Bu farw Anna Williams, 22 ac o ardal Penrhyndeudraeth, a Mili Wyn Ginniver, oedd yn chwe mis ac o Flaenau Ffestiniog, yn dilyn y gwrthdrawiad rhwng car a lori ger Gellilydan ar 11 Ionawr.

Mae mam Mili, Sioned Williams, yn parhau mewn cyflwr difrifol yn yr ysbyty yn Stoke.

Dywedodd cynghorydd lleol bod y digwyddiad wedi "syfrdanu" pawb yn yr ardal.

Bu farw Anna Williams a Mili Wyn Ginniver wedi gwrthdrawiad â lori ar yr A487

Y bwriad yw cynnal gwylnos arall ym Mhenrhyndeudraeth nos Iau

Roedd y dair yn teithio mewn Ford Fiesta oedd mewn gwrthdrawiad â lori ddydd Iau.

Ddydd Llun, diolchodd tad Mili a phartner Sioned Williams, Luke Ginniver, am y gefnogaeth y mae wedi ei gael ar ôl y digwyddiad.

Diolchodd am gyfraniadau ariannol, sydd wedi pasio £13,000, fyddai'n "help enfawr, enfawr dros yr wythnosau a misoedd i ddod".

• Gwrthdrawiad: Cronfa'n codi dros £10,000

• Gwrthdrawiad A487: Cyhoeddi enwau dwy

Ychwanegodd bod ei bartner yn parhau mewn cyflwr "difrifol ond sefydlog".

Dywedodd Gareth Thomas bod y gymuned wedi cael "clec go iawn"

Yn yr wylnos, dywedodd Cynghorydd Penrhyndeudraeth, Gareth Thomas bod y digwyddiad "wedi syfrdanu pawb yn yr ardal" a bod y gymuned "wedi cael clec go iawn".

"Ond wrth gwrs meddwl am y teulu ydyn ni, ac mae be' maen nhw'n mynd drwyddo fo yn erchyll.

"Be' 'da chi'n weld ydy cymuned yn cael sioc i ddechra' hefo, a dod at ei gilydd wedyn i gefnogi'r teulu, ac mae'r gefnogaeth yn Penrhyn a'r ardal yn anhygoel."

'Meddwl am y teulu'

Un oedd yn yr wylnos oedd Sharon Jones: "Mae pawb 'di teimlo'n ofnadwy ar ôl be sy' 'di digwydd, ac mae'n ffor' i bobl dd'eud ein bod ni yma ac yn meddwl am y teulu.

"Mae Port a Penrhyn a Blaenau, 'da ni gyd yn nabod ein gilydd, ac mae o'n ffordd o ddeud bod ni'n meddwl amdana' chi."

Mae disgwyl gwylnos arall ym Mhenrhyndeudraeth nos Iau, wythnos wedi'r digwyddiad.