Awdurdodau wedi 'methu' perchnogion cychod Caergybi

Mae'r dŵr wedi cael ei droi'n wyn gan filiynnau o ddarnau bach o bolestyrene

Mae dyn o Ynys Môn a gollodd ei gartref pan gafodd cychod eu dinistrio yn harbwr Caergybi wedi cyhuddo'r awdurdodau o fethu a gwneud dim i'w helpu.

Cafodd 80 o gychod eu difrodi ac fe suddodd rhai wrth i Storm Emma daro'r harbwr ddydd Iau.

Yn ôl Dave Parry, a oedd yn byw yno ar ei gwch, fe wnaeth yr awdurdodau eu "gadael" a chynghori eraill i beidio â chlirio'r tanwydd sydd wedi gollwng.

Dywedodd Heddlu Gogledd Cymru eu bod yn ceisio atal digwyddiadau troseddol ond yn ymchwilio i un adroddiad o ladrad o gwch.

Yn ôl Cyngor Môn, mae'n nhw'n "annog aelodau'r cyhoedd i (g)adael y gwaith glanhau i'r arbenigwyr oherwydd gallai bod malurion a deunydd peryglus yn yr ardal."

Dywedodd Mr Parry ei fod wedi ceisio, ond wedi methu, ac achub cychod pobl eraill pan darodd y storm.

"Ro'n i'n cropian ar fy mhengliniau yn ceisio achub cychod pobl eraill cyn i'r staff ymddangos", meddai ar Good Morning Wales.

Fe darodd Storm Emma harbwr Caergybi ddydd Iau diwethaf

"Mae lot o ddiesel yna erbyn hyn, mae'n dal i lifo allan o rhai cychod.

"Mae'r gwynt yn mynd i ddod o gyfeiriad y gorllewin unrhyw ddiwrnod hefyd, felly mi fydd y tanwydd yna'n cael ei chwythu allan i'r môr."

Cyhuddodd Cyngor Môn a'r heddlu o wneud dim byd i'w cynorthwyo, gan ddweud nad oedd unrhyw ymdrech i achub y cychod na'u gwarchod nhw.

Mae Mr Parry, sydd wedi byw ar y cwch ers blwyddyn, bellach yn aros gyda ffrindiau.

• Storm yn achosi difrod i gychod mewn harbwr ar Ynys Môn

Ddydd Gwener, roedd Gwylwyr y Glannau yn cynghori pobl i gadw draw o'r marina wrth iddyn nhw asesu maint y difrod.

'Dibynnu ar y marina'

Ar y Post Cyntaf fore Llun, dywedodd Maer Caergybi, Anne Kennedy, y bydd y cyngor tref yn ceisio cynorthwyo'r busnesau cymaint ag y gallen nhw.

Dywedodd: "Mae gynnon ni gyfarfod heno ac mi fydd y marina dan sylw i weld beth fedrwn ni gynnig i directors y marina.

"Cofiwch, nid yn unig y marina sydd wedi ei heffeithio. Mae 'na fusnesau eraill sy'n dibynnu ar y marina, maen nhw'n rhan o'r economi a'r gymuned hefyd."

Dywedodd Alun Roberts, Cadeirydd Fforwm Busnes Caergybi fod y marina'n "adnodd reit bwysig i'r dre'" ac y bydd y storm yn gadael ei hôl am beth amser eto.

"Mae 'na effaith tymor byr yn sicr yn mynd i fod, achos mae pobl sydd wedi cael difrod i'w cychod yn mynd i gymryd rhai misoedd i gael yswiriant i dalu am gael trin y cwch neu gael cwch newydd.

"Ac yn sicr perchnogion y marina, maen nhw'n mynd i gael misoedd, ella blynyddoedd o waith i adfer y marina i fel sut oedd hi."

'Deunydd peryglus'

Mewn datganiad brynhawn Llun, dywedodd Cyngor Môn: "Rydym ar hyn o bryd yn cydweithio gydag Asiantaeth y Môr a Gwylwyr y Glannau ac asiantaethau partner eraill, gan gynnwys cwmni'r marina a pherchnogion y porthladd, Stena.

"Byddwn yn annog aelodau'r cyhoedd i ddilyn yr arweiniad roddodd Asiantaeth y Môr a Gwylwyr y Glannau dros y penwythnos sef gadael y gwaith glanhau i'r arbenigwyr oherwydd gallai bod malurion a deunydd peryglus yn yr ardal."

Dywedodd Heddlu Gogledd Cymru eu bod yn ceisio atal digwyddiadau troseddol ond yn ymchwilio i un adroddiad o ladrad o gwch ar 3 Mawrth.

Dylai unrhyw un sy'n ymwybodol o achosion eraill o ladrata gysylltu ar 101.