Cofio am 'Bencampwr Cydraddoldeb' yn y Senedd
- Cyhoeddwyd
Bu farw Val Feld yn 2001
Bydd plac porffor yn cael ei osod ar wal y Senedd ym Mae Caerdydd ddydd Mawrth er cof am y cyn-Aelod Cynulliad, Val Feld.
Dyma fydd y cyntaf o gyfres o blaciau porffor i nodi gorchestion menywod nodedig.
Val Feld oedd AC cyntaf Dwyrain Abertawe, a bu'n eiriol dros hawliau cyfartal cyn, ac yn ystod, ei chyfnod yn y Cynulliad.
Bu farw o ganser yn 2001.
Cafodd y plac ei gomisiynu gan Jane Hutt AC a'r cyn-aelod Sue Essex er cof amdani, a bydd yn cael ei ddadorchuddio mewn seremoni arbennig gan ddwy ferch Ms Feld, Bronwen McCarthy a Hester Feld.
Dechreuodd yr ymgyrch i anrhydeddu Val Feld yn 2017
Cyn y seremoni dywedodd Ms Hutt: "Mae'n briodol bod y plac porffor cyntaf i gofio gorchestion menywod nodedig Cymru yn cofio am Val Feld, oedd yn daer dros ddatganoli, cydraddoldeb a chyfiawnder cymdeithasol.
"Roedd Val yn rym pwerus i fenywod a grwpiau lleiafrifol, ac mae'n iawn bod ei hygrededd, ymrwymiad a'i hangerdd yn cael cofeb barhaol gyda phlac 'Pencampwr Cydraddoldeb' ar wal y Senedd.
Dywedodd Hester Feld: "Rydym wrth ein bodd bod mam yn cael ei chofio fel hyn.
"Roedd yn gweithio'n galed yn ei bywyd i daflu goleuni ar anghydraddoldeb ac anghyfiawnder ac mae'n iawn fod y plac yn ddechrau ar ymgyrch i gydnabod gorchestion hanesyddol menywod yng Nghymru."