Medal arian i Menna Fitzpatrick yn PyeongChang

Mae'r sgiwraig Menna Fitzpatrick a'i thywysydd Jen Kehoe wedi ennill medal arian yng Ngemau Paralympaidd y Gaeaf.

Fe ddaethon nhw'n ail i Henrieta Farkasova a Natalia Subrtova o Slofacia yn y ras uwch gyfunol ar gyfer merched rhannol ddall.

Dyma ail fedal y Gymraes a'i thywysydd, a gafodd fedal efydd yn y gemau yn PyeongChang ddydd Sul.

Mae Fitzpatrick a Kehoe wedi bod yn cydweithio ers Medi 2015

Dywedodd Fitzpatrick wrth y BBC bod y profiad wedi bod yn un yn anhygoel: "Doeddwn i ddim yn fodlon iawn gyda fy sgïo ddydd Sul oherwydd roeddwn i'n eitha' statig a ddim yn dilyn yn llwybr Jen pan oedd hi'n gweiddi wrtha i am wneud hynny.

"Ond wedi'r Super G unigol, roedden ni'n gwybod fod gyda ni fedal yn y bag.

"Nawr, ry' ni jyst yn cael amser anhygoel ac yn mwynhau'r gemau Paralympaidd oherwydd yn aml iawn, ry' chi'n mynd drwy'r ras a jyst yn meddwl am sgïo."

Ychwanegodd Kehoe: "Mae'n hollol anhygoel dod yn ôl o ble roedden ni ddeuddydd yn ôl a chwblhau slalom a Super G parchus iawn, felly ry' ni ar ben ein digon."