Cyhoeddi enw'r beiciwr modur bu farw mewn gwrthdrawiad

Roedd Gareth Williams yn 60 oed

Mae enw'r beiciwr modur a bu farw yn dilyn gwrthdrawiad gyda char yn Sir Caerffili fore Iau wedi ei gyhoeddi gan Heddlu Gwent.

Roedd Gareth Williams, 60 oed, yn dod o ardal Bedwas, Caerffili.

Dywedodd teyrnged gan deulu Gareth ei fod yn "ddyn cariadus, anhunanol ac yn ŵr a thad ffyddlon".

Cafodd y gwasanaethau brys eu galw i'r digwyddiad ar yr A468 ym Machen Isaf am 07:50.

Cafodd y dyn oedd yn gyrru'r car ei gymryd i Ysbyty Brenhinol Gwent yng Nghasnewydd, ond mae bellach wedi ei ryddhau.

Mae'r heddlu'n parhau i ymchwilio i'r gwrthdrawiad ac yn gofyn i unrhywun sydd â gwybodaeth i alw 101.