Penodi cyn chwaraewr Cymru Sam Ricketts i reoli Wrecsam
- Cyhoeddwyd
Un o gyfarwyddwyr Wrecsam Spencer Harris (chwith)gyda'r rheolwr newydd Sam Ricketts
Cyn amddiffynnwr Cymru Ricketts yw rheolwr newydd Clwb Pêl-droed Wrecsam ar ôl arwyddo cytundeb tair blynedd.
Mae'n olynu Dean Keates, wnaeth adael i reoli Walsall ganol Mawrth, ac mae'n ymuno â'r Dreigiau o Wolverhampton, lle roedd ganddo rôl datblygu timau ieuenctid.
Dywedodd un o gyfarwyddwyr Wrecsam, Spencer Harris eu bod wedi penodi "ymgeisydd rhagorol i symud y clwb yn ei flaen."
Ychwanegodd fod "Sam yn ddyn â record ardderchog yn y byd pêl-droed ac rydym yn credu bod ganddo'r ymwybyddiaeth, yr egni a'r penderfyniad i ddod â llwyddiant i'r clwb."
Yn 36 oed, fe enillodd Ricketts 52 o gapiau rhyngwladol rhwng 2005 a 2014,
Fe chwaraeodd i Abertawe, Hull City, Bolton Wanderers a Coventry City cyn ymddeol yn 2016.
Andy Davies a Carl Darlington oedd rheolwr dros dro Wrecsam ers ymadawiad Keates.
Fe orffennodd Wrecsam yn 10fed yn y Gynghrair Genedlaethol - pedwar pwynt yn brin o gyrraedd safleoedd y gemau ail gyfle - ar ôl sicrhau saith pwynt yn unig allan o 27 posib wedi i Keates adael.
Ychwanegodd Harris ei fod yn siŵr y bydd y rheolwr newydd yn cael "y gefnogaeth wych arferol gan ein cefnogwyr ardderchog ac rydym yn edrych ymlaen gyda brwdfrydedd gwirioneddol at y tymor newydd."