Taith yr Haf: Yr Ariannin 10-23 Cymru
- Cyhoeddwyd
George North oedd sgoriwr ail gais Cymru
Llwyddodd Cymru i sicrhau buddugoliaeth gyfforddus dros yr Ariannin nos Sadwrn yn y cyntaf o ddwy ornest yn erbyn y tîm o dde America.
Yn dilyn ciciau cosb i'r naill ochr fe ddaeth cais gyntaf y gêm i James Davies yn y gornel yn dilyn dwylo da gan Hallam Amos.
Ychwanegodd Cymru ail gais cyn yr egwyl wrth i Gareth Davies ganfod bwlch yn dilyn tafliad lein, cyn bwydo George North a orffennodd y symudiad.
Ciciodd Rhys Patchell 10 pwynt i sicrhau bod Cymru'n cadw mantais gadarn, ac roedd y maswr yn un o nifer wnaeth argraff yn y crys coch.
Croesodd James Davies yn y gornel ar gyfer cais gyntaf Cymru
Fe wnaeth cais gysur hwyr gan Tomas Lezana roi rhywbeth i'r dorf gartref yn yr Estadio del Bicentenario yn San Juan ei ddathlu.
Ond bydd y perfformiad yn rhoi hyder i Gymru cyn yr ail brawf yn erbyn yr Ariannin yn Santa Fe ddydd Sadwrn nesaf.
Mae tîm Warren Gatland eisoes wedi trechu De Affrica o 22-20 yn Washington, UDA yng ngêm gyntaf eu taith haf.