Clwb Pêl-droed Abertawe'n diswyddo eu tîm sgowtio

Y rheolwr Graham Potter fydd nawr yn arwain strategaeth recriwtio Abertawe

Mae Clwb Pêl-droed Abertawe wedi diswyddo eu tîm sgowtio, gan ddweud mai'r rheolwr newydd Graham Potter fydd yn dewis pa chwaraewyr i'w harwyddo.

Mae is-reolwr Potter yn Ostersunds, Kyle Macauley, wedi'i benodi'n bennaeth recriwtio'r clwb, gan gymryd lle Dave Leadbeater.

Fe wnaeth perchnogion Abertawe - Steve Kaplan a Jason Levien - a'r cadeirydd Huw Jenkins gadarnhau'r newidiadau mewn datganiad ddydd Iau.

"Graham fydd yn penderfynu pa elfennau o'r tîm neu'r garfan sydd angen cryfhau," meddai'r datganiad.

"Bydd Kyle yn dod o hyd i chwaraewyr ac yn astudio'r holl wybodaeth sydd ar gael cyn darparu rhestr o chwaraewyr i geisio mynd ar eu hôl."

Bydd sgowt recriwtio technegol y clwb, Ian Henderson, ei ddirprwy Ian Roscow a dau sgowt arall - y cyn-reolwr Brian Flynn a chyn-golwr yr Elyrch Gerhard Tremmel - oll yn gadael.

Er bod rhai o'r rhai sy'n gadael wedi ymuno'n ddiweddar, mae Leadbeater wedi bod â'r clwb ers 2010 tra bod Henderson wedi ymuno yn 2012.