Uwch Gynghrair Lloegr: Caerdydd 1-2 Burnley

Llwyddodd Burnley i gosbi ymosodwyr gwastraffus yr Adar Gleision ar brynhawn rhwystredig yn Stadiwm Dinas Caerdydd.

Yr Adar Gleision oedd y tîm gorau yn yr hanner cyntaf gan roi pwysau cyson ar amddiffyn Burnley, ond prin oedd y cyfleoedd clir i naill dim neu'r llall.

Josh Murphy ddaeth agosaf i rwydo i Gaerdydd wrth iddo daro'r postyn yn dilyn gwaith ardderchog ar yr asgell chwith.

Arweiniodd chwarae taclus gan Victor Camarasa a Kenneth Zohore at arbediad campus gan Joe Hart, cyn i Callum Paterson ddod yn agos gyda pheniad cyn hanner amser.

Gwnaeth yr ymwelwyr ymosod o gychwyn cyntaf yr ail hanner, a chwta bum munud ar ôl yr egwyl cawsont eu gwobrwyo drwy beniad Johann Berg Gudmundsson wrth y postyn pellaf.

Fe wnaeth Caerdydd daro 'nôl drwy Murphy wedi 60 munud, wrth iddo grymanu'r bêl i gornel dde'r rhwyd o ganol y cwrt cosbi.

Ddeg munud yn ddiweddarach fe aeth Burnley yn ôl ar y blaen, wrth i ymosodwr Cymru, Sam Vokes, fanteisio ar amddiffyn llac Caerdydd i benio heibio Neil Etheridge.

Parhau i bwyso wnaeth y tîm cartref ond yn ofer.

Golyga'r golled fod Caerdydd yn parhau yn safle 19 yn y tabl.