Ceidwadwyr Cymreig yn galw am etholiad Cynulliad brys

Mae arweinydd Ceidwadwyr y Cynulliad wedi galw am etholiad cynulliad brys yn ystod ei araith yng nghynhadledd y blaid Geidwadol yn Birmingham ddydd Llun.

Ar ôl penderfynu ar olynydd y Prif Weinidog, Carwyn Jones, bydd pob un o'r pleidiau o fewn y cynulliad wedi newid eu harweinydd ers etholiad 2016.

Mae Paul Davies AC, a ddaeth yn arweinydd Ceidwadwyr y Cynulliad ym mis Medi, yn credu fod y newidiadau hyn yn ddigon o reswm i gynnal etholiad arall.

Soniodd Mr Davies hefyd am ei barodrwydd i gydweithio â Phlaid Cymru pan fo hynny'n bosib.

• Paul Davies i arwain Ceidwadwyr Cymru

• Paul Davies yn gwadu ei fod yn 'llwyd'

Dechreuodd y cyfnod enwebu ar gyfer arweinyddiaeth Llafur Cymru yn swyddogol ddydd Iau, gyda Mark Drakeford, Eluned Morgan a Vaughan Gething yn gobeithio dod yn Brif Weinidog.

Mae'n rhaid i ddau draean o Aelodau Cynulliad bleidleisio o blaid cyn y bydd modd cynnal etholiad brys.

'Barod am y frwydr'

Dywedodd Mr Davies fod gan bobl Cymru yr hawl i gael "dweud eu dweud" gan na fydd "mandad i lywodraethu" gan y Prif Weinidog newydd, "a dim ond etholiad cynulliad all sicrhau hynny".

Ychwanegodd fod y Ceidwadwyr Cymreig yn "barod am y frwydr ar gyfer dyfodol y genedl".

Er hynny, gwrthododd Prif Weinidog y DU, Theresa May, yr alwad mewn cyfweliad yn ddiweddarach.

Dywedodd wrth ITV Cymru bod angen canolbwyntio ar Brexit yn hytrach nag etholiad.

"Dwi'n meddwl ar hyn o bryd y dylen ni fod yn canolbwyntio ar gael y cytundeb Brexit iawn... Dyna sydd yn niddordebau'r wlad, nid etholiad brys."

Wrth gyfeirio at arweinyddiaeth Plaid Cymru, galwoddd Mr Davies ar Adam Price i beidio â chefnogi llywodraeth Lafur arall ym Mae Caerdydd.

Yn ôl Mr Davies: "Mae'r neges yn glir - fyddwn ni byth yn cytuno ar bob dim, ond lle fedrwn ni gydweld, beth am weithio gyda'n gilydd er lles pobl Cymru a sicrhau'r newid y mae Cymru ei angen."