Galw ar arweinydd Cyngor Sir y Fflint i gamu o'r neilltu

Dywedodd Aaron Shotton nad yw wedi cael cyfle eto i ymateb yn llawn i'r honiadau

Gall BBC Cymru ddatgelu fod arweinydd Cyngor Sir y Fflint wedi cael cais i gamu o'r neilltu yn wirfoddol tra bod ymchwiliad yn cael ei gynnal i gŵyn yn ei erbyn.

Cafodd y cais ei wneud gan gynghorwyr o'r gwrthbleidiau, a ddywedodd y gallai honiad o garwriaeth rhwng Aaron Shotton ac un o weithwyr y cyngor niweidio enw da'r awdurdod lleol.

Yn ôl adroddiadau mae'r ddynes oedd yn rhan o'r garwriaeth wedi colli ei swydd.

Dywedodd Mr Shotton fodd bynnag y byddai'n parhau yn ei swydd wrth i'r ymchwiliad i'w ymddygiad barhau, ac nad oedd wedi cael y cyfle eto i "ateb yr honiadau" yn llawn.

'Yn y tywyllwch'

Mewn llythyr cyfrinachol fe wnaeth arweinwyr y pedair gwrthblaid ar y cyngor - y Ceidwadwyr, y Democratiaid Rhyddfrydol, a dau grŵp o gynghorwyr annibynnol - alw ar Mr Shotton i gamu o'r neilltu tra bod ymchwiliad yr Ombwdsmon Gwasanaethau Cyhoeddus yn digwydd.

Mynnon nhw fodd bynnag nad fyddai gwneud hynny'n gyfaddefiad o euogrwydd gan Mr Shotton, ac mai lle'r ombwdsmon oedd dod i ddyfarniad ar hynny.

Yn dilyn adroddiadau fod y ddynes wedi colli ei swydd gyda'r cyngor, fe wnaeth y cynghorwyr ofyn am gyfarfod gyda phrif weithredwr yr awdurdod, Colin Everett yn ogystal â'r swyddog monitro.

Mae'r cynghorwyr o'r gwrthbleidiau wedi mynnu cyfarfod â phrif weithredwr yr awdurdod lleol

Ond fe gawson nhw wybod na fyddai hynny'n bosib nes ar ôl cyfarfod llawn nesaf y cyngor brynhawn ddydd Mawrth.

"Rydyn ni yn y tywyllwch ar hyn, sy'n siomedig," meddai Chris Dolphin, arweinydd grŵp y Democratiaid Rhyddfrydol.

"'Dyn ni'n teimlo y gallen ni fod wedi cael mwy o wybodaeth yn hytrach na darllen am hyn i gyd ar-lein."

Ychwanegodd arweinydd y grŵp Ceidwadol, Chris Carver: "Dylai wneud y peth iawn a chamu o'r neilltu nes i'r ymchwiliad ddod i ben... mae'n dod â sylw drwg i'r cyngor."

'Achos mewnol'

Mewn ymateb fodd bynnag dywedodd Mr Shotton ei fod wedi cyfarfod arweinwyr y gwrthbleidiau eisoes i esbonio ei safbwynt iddyn nhw.

"Fe wnaethon nhw dderbyn fy esboniad i y bydda i, gyda chefnogaeth fy ngrŵp, ac yn dilyn cyngor cyfreithiol, yn parhau yn fy rôl a fy mod i'n aros am y cyfle i ateb yr honiadau yn fy erbyn yn llawn," meddai.

"Gan fod proses eisoes ar y gweill gan Ombwdsmon Gwasanaethau Cyhoeddus Cymru, yn anffodus allai ddim gwneud sylw pellach ar hyn o bryd."

Ychwanegodd Cyngor Sir y Fflint mewn datganiad: "Does dim modd i ni wneud sylw ar fanylion achos cyflogaeth fewnol.

"Mae swyddfa'r Ombwdsmon Gwasanaethau Cyhoeddus yn annibynnol o'r cyngor, ac yn gyfrifol am unrhyw achosion o gamymddwyn honedig gan gynghorwyr y maen nhw'n ymchwilio iddynt."