Arestio dyn ar ôl canfod corff dynes yn Sir y Fflint
- Cyhoeddwyd
Cafodd corff y ddynes ei ganfod mewn tŷ ym Mhen-y-ffordd, rhyw ddwy filltir o bentref Mostyn
Mae dyn wedi cael ei arestio wedi i gorff gael ei ganfod mewn tŷ yn Sir y Fflint ddydd Mercher.
Cafodd swyddogion eu galw am tua 10:00 i leoliad ym mhentref Pen-y-ffordd ger Treffynnon, ble cafwyd hyd i gorff dynes.
Dywedodd Heddlu'r Gogledd fod dyn oedd hefyd yn y tŷ ar y pryd wedi cael ei arestio ar amheuaeth o lofruddiaeth.
"Mae teulu'r ddynes fu farw a chrwner Gogledd Cymru wedi cael gwybod," meddai'r llu mewn datganiad.
"Mae'n gynnar yn yr ymchwiliad ac fe fydd datganiad pellach yn dod yn y man.
"Dydyn ni ddim yn chwilio am unrhyw un arall mewn cysylltiad â'r digwyddiad."