Cau Pont y Borth am gyfnod amhenodol ar gyfer gwaith atgyweirio

Mae Llywodraeth Cymru wedi cyhoeddi y bydd un o'r pontydd sy'n cysylltu Ynys Môn â'r tir mawr yn cau am gyfnod amhenodol ar gyfer gwaith atgyweirio.

Fe gafodd cyfyngiadau pwysau newydd eu cyflwyno ddydd Gwener mewn ymgais i gadw Pont y Borth, neu Bont Menai, ar agor ond mae nawr wedi'i chau yn llwyr.

Daw'r penderfyniad wedi i waith archwilio ddarganfod bod angen bolltau newydd ar rai o'r trawstiau o dan y bont.

Mae'r Ysgrifenydd Trafnidiaeth Ken Skates wedi ymddiheuro gan ddweud eu bod yn gwneud "popeth o fewn eu gallu i ddatrys y sefyllfa cyn gynted ag y bo modd".

Dim ond cerbydau oedd yn pwyso llai na thair tunnell oedd yn cael croesi ddydd Gwener

Yn natganiad y Llywodraeth dywedon nhw eu bod wedi gwneud y penderfyniad ar sail ymchwiliad ddangosodd bod angen ailosod "rhai o'r bolltau ar drawstiau o dan y bont".

Ychwanegon nhw bod trefniadau wedi'u gwneud i sicrhau bod cerbydau argyfwng ar gael pe tai Pont Britannia yn cael ei heffeithio gan wyntoedd cryfion yn ystod Storm Amy.

Mewn ymateb i'r newyddion mae Rhun ap Iorwerth, yr Aelod lleol o'r Senedd wedi dweud bod y newyddion yn "rhwystredig iawn".

"Er bod rhaid i ddiogelwch fod yn flaenoriaeth, mae'n annerbyniol bod y bont wedi'i chau eto heb fawr o rybudd - yn union fel yr oedd bron i dair blynedd yn ôl" meddai.

"Mae pobl Ynys Môn wedi bod yn aros am flynyddoedd i'r gwaith yma gael ei gwblhau, ac mae eu hamynedd yn rhedeg allan."

Aeth ymlaen i ddweud ei fod mewn trafodaethau agos â Chyngor Sir Ynys Môn a "byddaf yn parhau i bwyso ar Lywodraeth Cymru am atebion brys ynghylch pam na chafodd y problemau diweddaraf eu darganfod yn gynt, sut y bydd hyn yn effeithio ar amserlen y prosiect, a pha fesurau fydd yn cael eu rhoi yn eu lle i liniaru'r impact anochel caiff y cyhoeddiad yma."

Mae cais wedi'i wneud am ymateb pellach gan Lywodraeth Cymru.

Ond mewn datganiad blaenorol fe ddywedodd Ken Skates: "Yn gyntaf, hoffwn ymddiheuro i'r bobl leol.

"Mae'n wir ddrwg gen i am yr aflonyddwch parhaus rydych chi'n ei wynebu wrth i'r gwaith barhau i adfer y bont".

Ychwanegodd eu bod wedi "archwilio pob opsiwn i gadw'r bont ar agor yn ddiogel" ond yn dilyn cyngor gan y peirianwyr sy'n gyfrifol am gynnal a chadw'r bont, Priffyrdd y DU A55, does dim opsiwn ganddyn nhw ond ei chau'n llwyr.

"Er gwaethaf ein holl rwystredigaethau mae'n rhaid i ni wrando ar gyngor peirianwyr i sicrhau diogelwch pawb" meddai.

Bydd y bont ar gau am gyfnod amhenodol tra bod ymchwiliadau pellach yn cael eu cynnal.

Mae disgwyl diweddariadau yn y dyddiau nesaf.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.