Galw am gefnogaeth Llywodraeth Cymru ar gytundeb Brexit

Mae David Lidington, Gweinidog Swyddfa Cabinet San Steffan, wedi galw ar lywodraethau Cymru a'r Alban i gefnogi cytundeb drafft Theresa May gyda'r Undeb Ewropeaidd.

Roedd Mr Lidington yn siarad cyn cyfarfod cyd bwyllgor gweinidogol y llywodraethau datganoledig ddydd Llun.

Dywedodd Mr Lidington: "Y cytundeb sydd ar y bwrdd yw'r cytundeb Brexit orau i bob rhan o'r Deyrnas Unedig."

Fe wnaeth Theresa May sicrhau cefnogaeth ei chabinet i'r cytundeb drafft ddydd Mercher diwethaf, ond fe ymddiswyddodd rhai o'i Llywodraeth mewn protest.

Yn y cyfamser, mae rhai aelodau seneddol Ceidwadol hefyd wedi galw am ddisodli Mrs May fel prif weinidog.

• Cairns yn gwrthod beirniadaeth Brexit

• Jones: Refferendwm arall os yw May yn gadael

Ond mae Mr Lidington yn mynnu nad oes modd cael cytundeb gwell.

"Mae busnesau ar hyd a lled y Deyrnas Unedig yn dechrau dangos eu cefnogaeth i sicrhau fod y cytundeb yn cael ei gwblhau," meddai.

"Dyna'r neges glir nes i glywed tra yng Nghymru a'r Alban ddydd Gwener.

"Fe fydd gan wleidyddion ym mhob plaid benderfyniad pwysig i wneud pan fydd y bleidlais yn dod gerbron Tŷ'r Cyffredin.

"Mae'n rhaid pwyso a mesur y risg o wrthwynebu'r cytundeb, cytundeb sy'n rhoi eglurder a sicrwydd y mae busnesau drwy'r Deyrnas Unedig am ei weld," meddai.

"Rwy'n gobeithio cyrraedd pwynt lle fydd holl lywodraethau datganoledig y DU yn gallu cefnogi'r cytundeb terfynol mae'r DU yn ei wneud gyda'r Undeb Ewropeaidd.

"Fe fyddwn yn parhau i weithio'n agos gyda llywodraethau Cymru a'r Alban, a'r gwasanaeth sifil yng Ngogledd Iwerddon er mwyn cyrraedd y nod."

Mae disgwyl i Mark Drakeford fynychu cyfarfod y cyd bwyllgor gweinidogol ddydd Llun

Mae disgwyl y bydd Mark Drakeford Ysgrifennydd Cyllid Cymru a Michael Russell o Lywodraeth yr Alban yn bresennol yn y cyfarfod dydd Llun.

Yn ogystal â Mr Lidington, mae disgwyl y bydd Ysgrifennydd Cymru Alun Cairns, David Mundell, Ysgrifennydd yr Alban a Karen Bradley Ysgrifennydd Gogledd Iwerddon yno.

Fe fydd y cyfarfod yn cael ei gynnal am 12:30 yn Swyddfa'r Cabinet yn Llundain.

Yr wythnos diwethaf dywedodd Carwyn Jones, prif weinidog Cymru y byddai o blaid cynnal refferendwm arall os oedd Theresa May yn cael ei disodli fel prif weinidog heb fod etholiad cyffredinol yn cael ei alw.

Ddydd Gwener ar raglen y Post Cyntaf ar Radio Cymru, dywedodd nad oedd "yn gweld e (y cytundeb drafft) yn mynd drwy San Steffan."

Ychwanegodd mai un o'r problemau oedd bod y cytundeb yn un dros dro ac felly, yn ei farn ef, ddim yn cynnig y sicrwydd sydd ei angen.