Ricketts: Cadwch draw meddai Wrecsam

Mae rheolwr Wrecsam Sam Ricketts wedi cael gorchymyn i gadw draw o'r gêm gwpan fawr yn erbyn Casnewydd nos Sadwrn.

Mae dyfalu bod Rickets wedi cael cynnig i ymuno â'r Amwythig yn dilyn cyfnod llwyddiannus yn y Cae Ras.

Mewn datganiad dywedodd llefarydd ar ran y clwb: "Oherwydd y dyfalu ynglŷn â dyfodol rheolwr ein tîm cyntaf Sam Ricketts, mae CPD Wrecsam yn teimlo nad yw hi'n briodol iddo fynychu'r gem heno.

"Byddwn yn ceisio cael eglurhad ynglŷn â'i sefyllfa mor fuan â phosib.

"Bydd Graham Barrow , Jussi Jaaskelainen a Carl Darlington yn rheoli'r tîm heno."

Bydd Wrecsam yn croesawu Casnewydd i'r Cae Ras yn ail rownd cwpan FA Lloegr nos Sadwrn.

Mae'r Amwythig, sy'n chwarae yn yr adran gyntaf, yn chwilio am reolwr ers diswyddo John Askey.