Ateb y Galw: Yr actor Aneirin Hughes
- Cyhoeddwyd
Yr actor Aneirin Hughes, o'r cyfresi poblogaidd Y Gwyll ac Un Bore Mercher, sy'n Ateb y Galw yr wythnos yma wedi iddo gael ei enwebu gan Gillian Elisa yr wythnos diwethaf.
Beth ydi dy atgof cyntaf?
John Henry Lefel Gopr yn ceisio neud i fi chwerthin fel un bach yn y pram. Ni allaf fynd mewn i'r manylion, rwy'n dal i gael triniaeth.
Pwy oeddet ti'n ei ffansio pan yn iau?
Valerie Singleton ac Auntie Gwladys.
Beth oedd y digwyddiad a gododd y mwya' o gywilydd arnat ti erioed?
Bo' fi'n ffansio Auntie Gwladys.
Pryd oedd y tro diwethaf i ti grïo?
Pan droiodd Valerie Singleton fi lawr.
Mae cariad Aneirin tuag at Valerie yn fythol
Oes gen ti unrhyw arferion drwg?
Oes.
Dy hoff le yng Nghymru a pham?
Penbontrhydybeddau - lle fy magwyd.
Y noson orau i ti ei chael erioed?
Nosweithiau pan anwyd y plant.
O archif Ateb y Galw:
Disgrifia dy hun mewn tri gair
Druid, Cŵps, Maes.
Beth yw dy hoff lyfr neu ffilm?
The Cloud Of Unknowing gan A. Nonymous. Achos ma' wastad rhywbeth i ddysgu.
Byw neu farw, gyda phwy fyddet ti'n cael diod. Pam?
Gérard Depardieu. Achos ma' hwnna'n gwbod shwd i yfed.
Mae'r actor Gérard Depardieu yn gallu yfed... ond efallai fod hynny wedi ei gael i mewn i drwbl weithiau...
Dyweda rywbeth amdanat ti dy hun nad oes yna lawer o bobl yn ei wybod.
Dechreuais Gôr Meibion yn Nhrefynwy.
Ar dy ddiwrnod olaf ar y blaned, beth fyddet ti'n ei wneud?
Cael peint a rhoi'r byd yn 'i le - fel pob dydd arall.
Beth yw dy hoff gân a pham?
Dove sono i bei momenti allan o Le Nozze di Figaro, lle mae'r Countess Almaviva yn canu am anffyddlondeb ei gŵr, yr hen Count.
Cwrs cyntaf, prif gwrs a phwdin - beth fyddai'r dewis?
Cwrs cyntaf, sawl un, digon o amrywiaeth - a moules mariniére heb hufen.
Roedd Aneirin yn edrych ychydig llai trwsiadus nag arfer wrth bortreadu Moc Thomas ar Pobol y Cwm
Petaset yn gallu bod yn rhywun arall am ddiwrnod, pwy fyddai fo/hi?
Peter Purves - cyn-gariad i Valerie Singleton.
Pwy sydd yn Ateb y Galw yr wythnos nesaf?
Lisa Victoria
