Valero yn ymateb wedi i danwydd lifo i aber ym Mhenfro

Purfa Valero yn Aberdaugleddau

Mae swyddogion yn ymateb i achos o lygredd olew yn Aberdaugleddau.

Dywedodd llefarydd ar ran Porthladd Aberdaugleddau bod petroliwm wedi llifo i'r dŵr ger purfa olew Valero am tua hanner nos ddydd Mercher.

Mewn datganiad, dywedodd y cwmni eu bod nhw'n cydweithio gyda'r asiantaethau perthnasol er mwyn rheoli'r llygredd, ond eu bod nhw'n methu cadarnhau faint o'r sylwedd sydd wedi mynd i'r dŵr.

Ychwanegodd eu bod nhw wedi dilyn eu cynlluniau wrth gefn ac wedi rhoi gwybod i'r awdurdodau lleol.

Yn ôl Mike Ryan, sy'n harbwrfeistr yn Aberdaugleddau, mae'r llygredd dan reolaeth ac maen nhw'n parhau i asesu a monitro'r sefyllfa.

• Adfer cerosin wedi llygredd nant

• Llygredd afon yn lladd miloedd o bysgod

Cafodd llongau eu rhwystro rhag hwylio am gyfnod ond bellach mae'r llwybrau wedi ailagor.

Mae'r cyhoedd wedi cael eu cynghori i fod yn wyliadwrus o unrhyw lygredd ar hyd yr arfordir.

Mae 'booms' yn cael eu gosod er mwyn amddiffyn y traethau

Dywedodd Andrea Winterton, Rheolwr Gweithrediadau Cyfoeth Naturiol Cymru: "Mae'n swyddogion ni wedi bod yn gweithio gydag Awdurdod Porthladd Aberdaugleddau ac asiantaethau eraill er mwyn lleihau effaith y tanwydd ar yr aber.

"Mae archwiliadau yn cael eu cynnal fel mesur rhagofalus, a bydd booms yn cael eu gosod er mwyn amddiffyn y traethau."

Ychwanegodd: "Mae'r ymchwiliad yn parhau ac rydyn ni mewn trafodaethau cyson gyda Valero."