ASau o Gymru yn galw ar May i wrthod gadael heb gytundeb

Mae 21 o Aelodau Seneddol o Gymru ymhlith dros 200 sydd wedi arwyddo llythyr yn annog Theresa May i ddileu'r posibilrwydd o Brexit heb gytundeb.

Dywedodd y gwleidyddion o'r blaid Lafur a Phlaid Cymru eu bod yn bryderus am sefyllfa o'r fath ar y diwydiant cynhyrchu ac yn ofni y gall swyddi gael eu colli.

Yn y llythyr gan grŵp trawsbleidiol o ASau, maen nhw'n rhybuddio y byddai gadael yr Undeb Ewropeaidd heb gytundeb yn achosi "niwed economaidd diangen".

Fe fydd pleidlais ar gytundeb Brexit Mrs May yn cael ei chynnal ar 15 Ionawr yn Nhŷ'r Cyffredin.

• May yn 'debygol' o golli pleidlais Brexit

Ar hyn o bryd, fe fydd y Deyrnas Unedig yn gadael yr Undeb Ewropeaidd ar 29 Mawrth 2019 - a hynny os ydy'r cytundeb Brexit yn cael ei basio gan Aelodau Seneddol neu beidio.

Mae'r holl ASau sydd wedi arwyddo'r llythyr wedi cael gwahoddiad gan y Prif Weinidog i'w chyfarfod yn Downing Street ddydd Mawrth.

Yn y llythyr i Mrs May, mae'r grŵp yn dweud: "Fel grŵp trawsbleidiol o Aelodau Seneddol, arweinwyr busnes a chynrychiolwyr, rydym wedi ein huno yn ein penderfyniad na ddylai'r Deyrnas Unedig adael yr Undeb Ewropeaidd heb gytundeb.

"Rydym yn annog y llywodraeth i gytuno i fecanwaith fyddai'n sicrhau na fyddai Brexit heb gytundeb yn gallu digwydd ac yn hyderus y byddai hwn yn llwybr y byddai'r Senedd yn ei gefnogi."