Cwmni ffonau symudol i gyflwyno technoleg 5G i Gaerdydd

Bydd Caerdydd yn un o'r dinasoedd cyntaf yn y DU i dderbyn signal 5G

Bydd rhwydwaith 5G ar gael i ddefnyddwyr ffonau symudol yng Nghaerdydd erbyn diwedd y mis.

Mae BT, sy'n berchen ar gwmni EE, wedi cadarnhau bydd y genhedlaeth nesaf o signal ffonau ar gael i'w cwsmeriaid yn y brif ddinas ar 30 Mai.

Bydd y dechnoleg newydd yn cynnig cysylltiad cyflymach â'r rhyngrwyd i ddefnyddwyr.

Dywedodd llefarydd ar ran EE bod cyflwyno'r rhwydwaith yn "helpu i gadw'r DU ar flaen y gad ym maes technoleg ddigidol".

• Cymru 'ar ei hôl hi' achos mastiau ffôn

Mae Caerdydd yn un o'r chwe dinas fydd yn cyflwyno'r dechnoleg wythnos nesaf.

Bydd modd defnyddio 5G yn Llundain, Belfast, Edinburgh, Birmingham a Manceinion hefyd.

Yn ôl arweinydd Cyngor Caerdydd, Huw Thomas, mae "denu busnesau i'r brif ddinas yn flaenoriaeth" ac mae gallu cynnig y rhwydwaith newydd yn "arwydd addawol iawn".

"Mae technoleg 5G yn cefnogi ein strategaeth ddigidol a'n huchelgais i foderneiddio ac integreiddio ein gwasanaethau cyhoeddus," meddai.

"Rydyn ni'n deall y bydd gofynion data yn cynyddu ac mae'r ffaith bod 5G wedi cyrraedd Caerdydd yn sicrhau ein bod ni'n parhau fel un o'r dinasoedd mwyaf cystadleuol yn y DU."