Adam Price a Stephen Kinnock yn cyfaddef defnydd cyffuriau

Roedd y panelwyr yn trafod ar raglen Question Time o Aberhonddu

Mae sawl gwleidydd wedi cyfaddef defnyddio cyffuriau pan yn ifanc, a hynny wrth ymddangos ar raglen Question Time y BBC.

Dywedodd Arweinydd Plaid Cymru, Adam Price, ac Aelod Seneddol Llafur, Stephen Kinnock, eu bod wedi cymryd cyffuriau.

Fe wnaeth cyn-ysgrifennydd Gogledd Iwerddon, Theresa Villiers, hefyd ddweud iddi drio canabis pan yn y brifysgol.

Roedd y panelwyr yn ymateb i gwestiwn yn dilyn cyfaddefiad Michael Gove, sy'n ymgeisio i arwain y Ceidwadwyr, iddo ddefnyddio cocên yn y gorffennol.

'Ddim am ddweud celwydd'

Ar y rhaglen, dywedodd Mr Price: "Fel dyn hoyw oedd yn mynd i glybiau nos yn y 1990au byddai'n ychydig o syndod os nad oeddwn i wedi cymryd cyffuriau.

"Dydw i ddim yn dweud mod i'n falch o hynny, ond dydw i ddim am ddweud celwydd amdano chwaith."

Ychwanegodd bod "15 miliwn o bobl yn y wlad hon wedi cymryd cyffuriau anghyfreithlon" a bod hynny'n arwydd bod "gwaharddiad wedi methu, yn y ffordd fwyaf anobeithiol".

Dywedodd Stephen Kinnock ac Adam Price eu bod wedi cymryd cyffuriau pan yn iau

Dywedodd Mr Kinnock, aelod Llafur dros Aberafan, ei fod wedi ei fagu a chael ei addysg yng ngorllewin Llundain, mewn ardal "gymysg iawn, iawn".

"Cyn belled ag oeddwn i'n ei weld roedd tua hanner y rhai yna yn smygu canabis ac roeddwn i'n rhan o'r hanner hynny," meddai.

Ychwanegodd ei fod hefyd yn rhan o'r sîn cerddoriaeth house yn y 1990au.

"Mae'r rhyfel yn erbyn cyffuriau'n cael ei golli... gan achosi niwed difrifol i gymdeithas, torcalon."

Dywedodd cyn-ysgrifennydd Gogledd Iwerddon, Ms Villiers, ei bod wedi defnyddio canabis ar dri achlysur yn y brifysgol, ond ei fod wedi ei gwneud hi'n sâl.

"Felly wnes i ddim ei gyffwrdd eto a buaswn i ddim yn ei argymell i neb arall," meddai.

Er iddi ddweud ei bod hi'n "bragmataidd" tuag at bolisi cyffuriau, nid oedd am gefnogi cyfreithloni canabis oherwydd yr "effeithiau iechyd difrifol iawn".