Ffynonellau Llafur 'yn disgwyl colli' isetholiad Caerffili
- Cyhoeddwyd
Mae nifer o ffynonellau Llafur wedi dweud wrth BBC Cymru y bydd y blaid yn colli isetholiad Caerffili.
Byddai'n golygu'r diwedd i fwy na chanrif o fuddugoliaethau Llafur yn yr etholaeth mewn etholiadau San Steffan a'r Senedd.
Mae arolygon barn diweddar yn awgrymu bod Plaid Cymru a Reform yn brwydro i herio goruchafiaeth Llafur yng Nghymru.
Mae ffynonellau yn y ddwy blaid yn dweud bod y gystadleuaeth rhyngddynt yng Nghaerffili yn agos.
Bu arweinwyr y ddwy blaid, Rhun ap Iorwerth a Nigel Farage, yn ymgyrchu yno ddydd Iau.
Daw'r isetholiad dim ond chwe mis cyn etholiadau'r Senedd a bydd yn cael ei weld fel un arwydd o'r hyn a allai ddigwydd fis Mai nesaf.
Dywedodd un ffynhonnell o'r Blaid Lafur fod y golled ddisgwyliedig yng Nghaerffili yn "ergyd i Starmeriaeth nid i'r prif weinidog Eluned Morgan," gyda Ms Morgan wedi bod yn gymharol boblogaidd ar y stepen ddrws.
Ond rhybuddiodd y ffynhonnell fod angen i'r prif weinidog "hawlio ei hun" a gwahaniaethu Llafur Cymru gymaint â phosibl oddi wrth blaid y DU yn y cyfnod cyn yr etholiad nesaf.
Mae disgwyl i Aelodau Senedd Llafur gynnal cyfarfod fore Gwener.
Y blychau pleidleisio wedi cau
Mae'r blychau pleidleisio wedi cau, wrth i bobl yng Nghaerffili ethol aelod newydd o'r Senedd i'r ardal.
Roedd y canolfannau pleidleisio ar agor o 07:00 tan 22:00, ac mae disgwyl y bydd canlyniad yn cael ei gyhoeddi yn gynnar fore Gwener.
Gallwch ddilyn y cyfan o'r cyfrif ar lif byw arbennig Cymru Fyw trwy gydol y nos, a bydd yr holl ymateb i'r canlyniad trwy'r bore.
Fe gafodd yr isetholiad ei alw ar ôl marwolaeth y cyn-aelod Llafur Hefin David.
Bu farw Mr David yn sydyn ar 12 Awst yn 47 oed. Roedd wedi bod yn Aelod o'r Senedd dros Gaerffili ers 2016.
Mae wyth ymgeisydd yn sefyll, a bydd yr enillydd yn Aelod o'r Senedd tan fis Mai 2026 pan fydd yr etholiad llawn nesaf i'r Senedd yn cael ei gynnal.
Yn wahanol i etholiadau i San Steffan, roedd pobl 16 a 17 oed yn cael pleidleisio yn yr etholiad hwn ac nid oedd angen dangos dogfen adnabod cyn pleidleisio.
Rhestr lawn o ymgeiswyr isetholiad Caerffili
Democratiaid Rhyddfrydol Cymru - Steve Aicheler
Gwlad - Anthony Cook
Y Blaid Werdd - Gareth Hughes
Ceidwadwyr - Gareth Potter
Reform UK - Llŷr Powell
UKIP - Roger Quilliam
Llafur - Richard Tunnicliffe
Plaid Cymru - Lindsay Whittle