Cofnodi rheithfarn naratif yng nghwest marwolaeth Magaluf

Mae'r crwner yn y cwest i farwolaeth dyn 18 oed o Fro Morgannwg ym Magaluf y llynedd wedi dweud bod hi'n "hollol drasig" bod llety gwyliau heb weithredu camau diogelwch syml a allai fod wedi atal y farwolaeth.

Syrthiodd Thomas Channon o'r Rhws 70 troedfedd dros wal isel yng ngwesty Eden Roc yng Ngorffennaf 2018 tra ar wyliau gydag wyth o ffrindiau i ddathlu diwedd eu harholiadau Safon Uwch.

Mr Channon, oedd yn cael ei nabod fel Tom, oedd y trydydd ymwelydd o'r DU i farw yn y safle mewn blwyddyn - bu farw Thomas Hughes, 20 oed ac o Wrecsam, yno fis ynghynt mewn amgylchiadau tebyg.

Gan gofnodi rheithfarn naratif, dywedodd Crwner Pontypridd, Graeme Hughes bod "camau syml [fel] codi ffens heb eu hysgogi gan farwolaeth Thomas Hughes".

"Fe fyddai'r camau hynny, yn ôl pob tebyg, wedi atal marwolaeth Tom [Channon]."

Clywodd y cwest bod pyst metel wedi eu codi ar ben y wal erbyn hyn.

Dywedodd y crwner bod Tom yn debygol o fod yn "feddw a blinedig" wrth ddychwelyd i'r gwesty ond "ddim yn eithriadol o feddw nac afreolus".

Roedd wedi bod yn yfed mewn bar gyda ffrindiau tan yr oriau mân.

Dywedodd y ffrind olaf i'w weld yn fyw, Raied Jones, ei fod wedi siarad ag e tua 04:00 ryw 20 metr o'u gwesty.

Roedd Tom "ychydig yn feddw", meddai. "Gofynnes i a oedd e'n ok ac yn gwybod y ffordd adre a dywedodd e fod e'n iawn."

Dechreuodd y grŵp boeni amdano wrth gyrraedd y gwesty ond roedden nhw'n meddwl ei fod yn ei ystafell gyda chyfaill oedd heb fynd allan gyda'r gweddill.

Wnaethon nhw ddim sylweddoli ei fod ar goll nes rhwng 10:00 ac 11:00 y diwrnod canlynol.

Man peryglus

Gofynnodd mam Tom, Ceri Channon, wrtho a gafodd y grŵp unrhyw gyngor diogelwch wrth gyrraedd neu wybodaeth bod llanc arall wedi syrthio yno.

Atebodd Mr Jones, "Na, dim byd o gwbwl".

Dywedodd adroddiad patholegydd Sbaenaidd bod y fan o le syrthiodd Mr Channon ar lefel y stryd ar un ochor ond yn saith llawr o uchder ar yr ochor arall.

Roedd Thomas Channon yn agos i westy Eden Roc pan gafodd ei weld ddwytha gan un o'i ffrindiau

Roedd yr adroddiad yn dod i'r casgliad, meddai'r crwner' "bod y fan yn un peryglus oherwydd y gwahaniaeth mawr ar ddwy ochor i'r wal".

Y gred yw bod Mr Channon wedi marw rhwng 08:00 a 09:00.

Ar ôl adolygu adroddiad yr awtopsi a gafodd ei gynnal yn Majorca, fe gadarnhaodd y patholegydd fforensig o Gaerdydd, Dr Richard Jones, ei fod wedi marw o drawma ar ôl taro'r llawr.

Roedd y lefel alcohol yn ei waed bron â bod ddwywaith y lefel gyfreithiol i yrru.

Dywedodd y crwner na allai gofnodi rheithfarn o farwolaeth ddamweiniol oherwydd diffyg tystiolaeth i brofi sut laniodd Mr Channon ar waelod y wal.