Prif weithredwr Bwrdd Iechyd Cwm Taf ar absenoldeb salwch

Allison Williams

Prif weithredwr Cwm Taf Allison Williams yn cael ei holi gan ACau, gyda'r cadeirydd Marcus Longley

Mae prif weithredwr bwrdd iechyd sydd dan fesurau arbennig ar absenoldeb salwch estynedig.

Cafodd gwasanaethau mamolaeth Cwm Taf Morgannwg eu rhoi dan fesurau arbennig yn dilyn nifer o achosion difrifol yn Ysbyty Brenhinol Morgannwg ger Llantrisant ac Ysbyty'r Tywysog Charles ym Merthyr Tudful.

Mae Allison Williams ar "gyfnod estynedig o absenoldeb salwch".

Fe fydd dirprwy brif weithredwr Caerdydd a'r Fro, Dr Sharon Hopkins, yn cymryd ei lle yn y cyfamser.

Daw hyn wedi i Gyngor Rhondda Cynon Taf basio cynnig o ddiffyg hyder yn Ms Williams mewn pleidlais unfrydol nos Fercher.

Cafodd tîm adolygu annibynnol eu galw yn yr hydref y llynedd yn sgil pryderon am farwolaethau nifer o fabis yn y ddau ysbyty.

Roedd yr adolygiad yn nodi bod menywod wedi cael "profiadau gofidus a gofal gwael".

Cynigiodd Ms Williams ymddiheuriad cyhoeddus gan ddweud bod hi'n "flin iawn am y methiannau" a nodwyd.

Ond mae 'na bwysau wedi eu rhoi ar rai o'r uwch swyddogion i ymddiswyddo.

Mae panel annibynnol - dan arweinyddiaeth Mick Giannasi - yn goruchwylio'r gwelliannau.

Mae'r gwasanaethau mamolaeth wedi eu rhannu rhwng Ysbyty Brenhinol Morgannwg ac Ysbyty'r Tywysog Charles

Dywedodd Athro Marcus Longley, cadeirydd y bwrdd iechyd: "Yn anffodus mae Allison Williams, ein prif weithredwr, ar gyfnod estynedig o absenoldeb oherwydd salwch. Felly mae trefniadau dros dro ar waith."

Cadarnhaodd fod Dr Hopkins, sydd ar hyn o bryd yn gyfarwyddwr trawsnewid gyda Bwrdd Iechyd Prifysgol Caerdydd a'r Fro, wedi cytuno i ymuno â nhw fel y prif weithredwr dros dro o ddydd Llun nesaf.

"Rwy'n falch y bydd rhywun o brofiad GIG Sharon ar lefel uchel iawn yn ymuno â ni'r wythnos nesaf ac rwy'n hyderus y bydd yn darparu arweinyddiaeth gref wrth i ni fynd i'r afael â'r heriau niferus sy'n ein hwynebu nawr," ychwanegodd yr Athro Longley.

Straeon perthnasol