Dyn 22 oed wedi marw mewn gwrthdrawiad ym Mhont-y-pŵl
- Cyhoeddwyd
Fe wnaeth y fan daro cerbyn oedd wedi'i barcio ar Heol Penywain ym Mhont-y-pŵl
Mae dyn 22 oed wedi marw yn dilyn gwrthdrawiad ym Mhont-y-pŵl nos Lun.
Cafodd y gwasanaethau brys eu galw i'r digwyddiad ar Heol Penywain yn ardal Wainfelin am tua 19:45.
Dywedodd Heddlu Gwent bod fan Renault Kangoo gwyn wedi taro yn erbyn cerbyd oedd wedi'i barcio.
Bu farw'r dyn lleol, oedd yn teithio yn y Renault, yn y fan a'r lle.
Fe wnaeth person arall oedd yn teithio yn y cerbyd - dyn 27 oed o Gaerdydd - ddioddef anafiadau difrifol ac fe gafodd ei gludo i Ysbyty Athrofaol Cymru yn y brifddinas.
Mae'r heddlu'n apelio ar dystion neu unrhyw un sydd â fideo dash-cam o'r ardal o amgylch amser y digwyddiad i gysylltu â'r llu.
Dywedon nhw eu bod yn enwedig eisiau siarad â gyrrwr BMW oren oedd yn yr ardal ar y pryd.