Glaw'n atal ail gêm Morgannwg yn olynol

Am yr ail dro'r wythnos hon mae gêm Morgannwg yn y T20 wedi cael ei chanslo oherwydd tywydd gwael.

Roedden nhw i fod i wynebu Essex yn Chelmsford nos Wener, ond fe benderfynwyd bod rhaid atal y gêm cyn iddi ddechrau.

Mae'n golygu bod Morgannwg yn parhau ar waelod y tabl - bedwar pwynt y tu ôl i Essex - ac eto i ennill gêm yn y T20.

Ddydd Sul mae Morgannwg yn chwarae nesaf, ar ddiwrnod cyntaf gêm yn erbyn Sir Gaerhirfryn yn y Bencampwriaeth Sirol ym Mae Colwyn.