Tri yn yr ysbyty wedi gwrthdrawiad ger Dinas Mawddwy

Mae tri pherson wedi cael eu cludo i'r ysbyty yn dilyn gwrthdrawiad rhwng dau gerbyd ger Dinas Mawddwy fore Mawrth.

Cafodd y gwasanaethau brys eu galw i'r digwyddiad yn dilyn adroddiadau o wrthdrawiad rhwng lori a char ar yr A470 am tua 08:25.

Mae'r teithiwr oedd yn y car wedi cael ei gludo i Ysbyty Stoke gan yr Ambiwlans Awyr gydag anafiadau difrifol.

Cafodd dau berson arall hefyd eu cludo i'r ysbyty am driniaeth.

Cafodd y ffordd ei chau i'r ddau gyfeiriad wedi'r gwrthdrawiad ac mae'r heddlu bellach yn apelio am wybodaeth gan unrhyw un oedd yn dyst i'r digwyddiad.

Y ddau gerbyd oedd yn rhan o'r gwrthdrawiad oedd lori Daf a char 4X4 lliw browngoch, ac fe ddigwyddodd ar fwlch yr A470 rhwng Cross Foxes a Mallwyd.