Ateb y Galw: Yr actor Dion Davies
- Cyhoeddwyd
Yr actor Dion Davies sy'n Ateb y Galw yr wythnos yma, ar ôl iddo gael ei enwebu gan Aeron Pughe yr wythnos diwethaf.
Mae Dion yn wyneb adnabyddus i wylwyr rhaglenni plant S4C, fel Jim yn Jen a Jim Pob Dim, ac un hanner y brodyr hwyliog, Y Doniolis.
Beth ydi dy atgof cyntaf?
Pan o'n i'n bedair mlwydd oed o'n i'n ysbyty'r Waun yn gwella wedi triniaeth ar fy ngwddf (ges i ngeni heb oesophagus, y biben fwyd) a phenderfynais fwyta pwdin siocled meddal. Yn anffodus oedd y pwythau yn fy nhwddf heb gau yn iawn ac felly dechreuodd y pwdin lifo allan o'r graith dros fy mhyjamas a nes i banicio'n llwyr cyn i Mam esbonio'r sefyllfa a cwlio fi lawr. Ma'n atgof eithaf traumatic!
Pwy oeddet ti'n ei ffansio pan yn iau?
Natalie Imbruglia.
Enillodd Natalie Imbruglia lawer o wobrau (a ffans) am ei sengl 'Torn' yn 1997
Beth oedd y digwyddiad a gododd y mwya' o gywilydd arnat ti erioed?
Meddwl bo' fi'n boddi yn y môr yn Barbados ond pan 'nath rhywun weiddi arna'i i sefyll lan, o'dd y môr dim ond yn cyrraedd fy nghanol... O'dd pawb ar y traeth yn chwerthin arna i am weddill y gwylie!
Pryd oedd y tro diwethaf i ti grïo?
Diwedd Avengers: Endgame pan 'nath Tony Stark farw. Fi'n crïo mewn ffilmiau trwy'r amser.
Oes gen ti unrhyw arferion drwg?
Taro ambell rech a rhoi'r bai ar aelodau eraill y teulu
Dy hoff le yng Nghymru a pham?
Glantawela, Silian ger Llambed oherwydd dyma ble o'n i'n mynd ar fy ngwylie yn yr haf pan o'n i'n ifanc i aros gyda Wncwl Alun, Anti Ber a nghefndryd i, Guto ac Osian. Atgofion melys!
O archif Ateb y Galw:
Y noson orau i ti ei chael erioed?
Noson dathlu fy mhriodas gyda teulu, ffrindiau a'r Mrs wrth gwrs.
Disgrifia dy hun mewn tri gair
Cyfeillgar, cwrtais a charedig - er ma' fy ngwraig yn dweud mai 'gwahanol' yw'r gair iawn i ddisgrifio fi!
Beth yw dy hoff lyfr neu ffilm?
Goodfellas - ma' fe'n glasur.
Mae Goodfellas, a gafodd ei ryddhau yn 1990, yn 'glasur'
Byw neu farw, gyda phwy fyddet ti'n cael diod. Pam?
Gyda fy mrawd, achos ma' gyda ni'r un hiwmor a s'mo ni byth yn ca'l nosweth tawel yn cwmni'n gilydd!
Dyweda rywbeth amdanat ti dy hun nad oes yna lawer o bobl yn ei wybod.
Fel soniais i, cefais fy ngeni heb oesophagus, felly cefais un wedi i greu allan o fy lower intestine pan o'n i'n bedair (a dyna pam dwi'n siarad gyment o g*chu!).
Ar dy ddiwrnod olaf ar y blaned, beth fyddet ti'n ei wneud?
Trefnu parti anferthol i fy nheulu a ffrindiau agosaf.
Beth yw dy hoff gân a pham?
Imagine, John Lennon - ma' fe jest yn atgoffa fi o fy mhlentyndod pan glywes i fe'n gyntaf ac o'n i'n dwli ar yr alaw. Hyd heddiw ma'r geiriau hefyd yn meddwl rhywbeth i fi hefyd - er efallai braidd yn obeithiol yn yr amseroedd gwallgof sydd yn y byd heddiw!
Albwm John Lennon, Imagine, a gafodd ei ryddhau yn 1971 - arno oedd un o'i senglau enwocaf, sef hoff gân Dion
Cwrs cyntaf, prif gwrs a phwdin - beth fyddai'r dewis?
Lobster i ddechrau, chateaubriand (fillet) a'r holl trimins i'r prif gwrs a wedyn pancakes tenau fy mam gyda hufen iâ Ben &Jerry'sPhish Food i orffen.
Petaset yn gallu bod yn rhywun arall am ddiwrnod, pwy fyddai fo/hi?
Fy mab Daniel er mwyn gweld y byd trwy lygaid plentyn unwaith eto, a gweld pa mor wahanol byddai plentyndod heddi i gymharu gyda fy mhlentyndod i.
Pwy sydd yn Ateb y Galw wythnos nesaf?
Simon Watts
