Prif Weinidog eisiau enw dwyieithog i'r Cynulliad

Fe wnaeth Mark Drakeford gadarnhau byddai gweinidogion y llywodraeth yn cael eu chwipio i gefnogi cynnig Carwyn Jones.

Mae Prif Weinidog Cymru, Mark Drakeford wedi cadarnhau bydd Llywodraeth Cymru'n cefnogi cynnig sy'n ceisio sicrhau bod y Cynulliad yn cael enw dwyieithog pan fydd yn cael ei ail enwi.

Bydd ACau yn pleidleisio ddydd Mercher ar gynlluniau i newid yr enw presennol - Senedd.

Dywedodd Mr Drakeford ei fod yn disgwyl i bobl ddefnyddio'r term Cymraeg wrth gyfeirio at y sefydliad pob dydd.

Ond ychwanegodd fod dadl dros gael mwy o eglurder yn y gyfraith.

• Enw'r Senedd i gynnwys esboniad Saesneg

• Newid enw'r Cynulliad Cenedlaethol

• Enw newydd Aelodau Cynulliad yn 'drysu'

Mae'r cyn brif-weinidog, Carwyn Jones wedi cyflwyno newid byddai'n golygu mai Senedd Cymru fyddai'n cael ei ddefnyddio ar gyfer y Cynulliad yn y Gymraeg a'r term 'Welsh Parliament' yn cael ei ddefnyddio yn y Saesneg.

"Yn bersonol rwy'n defnyddio'r gair Senedd, a dwi'n siŵr yn gyffredinol dyna fyddai pobl Cymru yn ei wneud," meddai Mr Drakeford.

Mae Carwyn Jones wedi cyflwyno newid byddai'n golygu mai Senedd Cymru fyddai'n cael ei ddefnyddio ar gyfer y Cynulliad yn y Gymraeg a'r gair 'Parliament' yn cael ei ddefnyddio yn y Saesneg.

Ond fe eglurodd fod "angen bod yn glir o ran y gyfraith".

"Mae dadl wahanol rhwng yr hyn byddwn yn ei roi ar bapur a beth yw fy marn bersonol i o beth fyddai'n cael ei ddefnyddio o ddydd i ddydd," meddai.

Chwipio gweinidogion i gefnogi

Fe wnaeth Mr Drakeford gyfeirio at y term sy'n cael ei ddefnyddio ar gyfer Senedd Gweriniaeth Iwerddon.

"Rydym wastad yn defnyddio'r esiampl o'r Dáil yn yr Iwerddon - dim ond Dáil mae pobl yn ei ddefnyddio.

"Ar bapur ac yn gyfreithiol mae term ehangach na hynny."

Fe wnaeth Mr Drakeford hefyd gadarnhau byddai gweinidogion y llywodraeth yn cael eu chwipio i gefnogi cynnig Carwyn Jones.

Ond, dywedodd y byddai aelodau meinciau cefn Llafur yn cael pleidlais rydd.