'All Warren Gatland edrych yn ôl â balchder mawr'

Ar ôl bron i 12 mlynedd a dros 120 o gemau wrth y llyw, mae Warren Gatland yn paratoi am ei gêm olaf fel prif hyfforddwr Cymru.

Dyw'r cylch ddim cweit wedi troi'n llawn - fe ddechreuodd ei deyrnasiad gyda buddugoliaeth annisgwyl yn erbyn Lloegr yn Twickenham, fe fyddai gorffen yn yr un modd yn Yokohama wedi bod yn ddiweddglo tylwyth teg.

Y peth nesa' at hynny byddai curo'i famwlad am y tro cyntaf ond rwy'n ofni bod hynny'n gofyn am fwy o hud a lledrith na mae'r bodau bach yna hyd yn oed yn meddu arno!

• Naw newid i Gymru i herio'r Crysau Duon

Ond beth bynnag fydd yn digwydd yn Tokyo nos Wener fe all Gatland edrych 'nôl ar ei gyfnod yn y swydd gyda balchder mawr.

Tair Camp Lawn, dwy rownd gynderfynol ac un wyth ola' yng Nghwpan y Byd, a hyd yn oed cyrraedd rhif un y byd am sbel fach.

Penstiff neu benderfynol?

Cysondeb a gwneud Cymru'n dîm anodd i'w curo oedd sylfaen athroniaeth Gatland er ei fod e wedi wynebu beirniadaeth bod y rygbi roedd Cymru'n chwarae ar adegau'n rhy unffurf ac anhyblyg.

Ond roedd e'n gwbl ddi-droi'n-ôl, ennill oedd yn bwysig er mwyn magu hyder a gwella - penstiff neu benderfynol?

Pawb a'i farn, ond does dim amau bod parch yn rygbi Cymru wedi'i adfer a'u bod bellach yn gallu cystadlu yn erbyn goreuon y byd.

Mae Tomos Williams, Dillon Lewis ac Adam Beard ymysg y chwaraewyr ifanc sydd wedi sefydlu eu hunain yng ngharfan Cymru

Mae'r gwelliant yn y canlyniadau yn erbyn timau hemisffer y de - ac eithrio Seland Newydd - yn brawf o hynny.

A'r gwaddol mae Gatland yn gadael i Wayne Pivac? Wel, mae 'na bellach gnewyllyn o chwaraewyr sydd wirioneddol yn credu ac wedi dangos eu bod nhw'n gallu ennill gemau tynn, anodd.

Mae'r dycnwch meddyliol yno i fynd gyda'r ffitrwydd ac mae Gatland wedi meithrin haid o chwaraewyr ifanc sydd eisoes wedi cael cryn brofiad ar y lefel rhyngwladol.

Aaron Wainwright, 22 oed, 18 cap. Dillon Lewis, 23 oed, 21 cap. Adam Beard, 23 oed, 19 cap. Tomos Williams, 24 oed, 15 cap - i enwi ond ychydig.

Mae Warren Gatland yn gadael tîm Cymru mewn man llawer cryfach nag oedd e pan gyrhaeddodd e.

Felly diolch Gats a phob hwyl 'nôl yn Waikato.