Ymadawiad Bennett yn golygu mai ond un AC UKIP sydd ar ôl

Mae Gareth Bennett yn Aelod Cynulliad dros ranbarth Canol De Cymru ers 2016

Mae Aelod Cynulliad UKIP, Gareth Bennett wedi cyhoeddi ei fod yn gadael y blaid er mwyn eistedd fel aelod annibynnol, sy'n gadael ond un aelod o'r blaid ar ôl yn y Cynulliad.

Dim ond Neil Hamilton sydd nawr ar ôl fel aelod o UKIP, wrth i Mr Bennett ddweud ei fod yn gadael er mwyn gallu cefnogi cytundeb Brexit y Prif Weinidog, Boris Johnson.

Mr Bennett yw'r chweched AC UKIP i adael y blaid ers refferendwm yr UE yn 2016.

Ar ôl dod i'r brig ar draws y DU yn ystod etholiadau Ewrop yn 2014, fe wnaeth UKIP orffen yn wythfed ym mis Mai, gan golli ei holl aelodau o senedd Ewrop i Blaid Brexit - sy'n cael ei arwain gan gyn-arweinydd UKIP, Nigel Farage.

• Ffurfio grŵp Brexit Party yn y Cynulliad

• ACau yn gwahardd Gareth Bennett

• Aelod Cynulliad UKIP yn gadael y blaid

Mae UKIP a Phlaid Brexit yn dweud nad yw'r cytundeb presennol sydd wedi'i lunio gan Boris Johnson i adael yr UE yn "Brexit go iawn".

Fe wnaeth Michelle Brown adael grŵp UKIP ym mis Mawrth ac mae hi'n parhau'n AC annibynnol.

Yn ystod cynhadledd UKIP yng Nghasnewydd ym mis Medi, dywedodd Mr Bennett fod y blaid yn "arbenigo ar ffraeo gyda'i gilydd".

Mewn datganiad, dywedodd Mr Bennett: "Mae'r cyhoedd wnaeth bleidleisio i adael yr UE wedi disgwyl dros dair blynedd a hanner a dydyn ni dal heb adael.

"Mae yna berygl mawr o hynny ddigwydd mewn gwirionedd, os na fydd cytundeb Boris Johnson yn mynd drwodd, yna fyddwn ni ddim yn gadael o gwbl.

"Mae'r rheiny ohonom ni oedd eisiau cytundeb caletach nawr yn sylweddoli mai cytundeb Boris yw'r gorau y gallwn gael ar hyn o bryd," meddai.

Fe wnaeth pedwar cyn ACau UKIP, Mark Reckless, Mandy Jones, Caroline Jones a David Rowlands i gyd ymuno â Phlaid Brexit ym mis Mai, roedd tri ohonyn nhw eisoes wedi gadael UKIP i eistedd yn annibynnol.

Fe wnaeth Michelle Brown adael grŵp UKIP ym mis Mawrth ac mae hi'n parhau'n AC annibynnol.